Wuhan lalnu Sabalenka
A zawna a vawithumna atan top seed Aryna Sabalenka chu Pathianni khan Wuhan Open-ah a champion leh ta a, final-a a khingpui Chinese fifth seed Zheng Qinwen lakah 6-3, 5-7, 6-3 hnehna a chang.
Inrinni semi-final pakhat zawka US Open champion hlui Coco Gauff vawtlatu kum 26-a upa Belarusian hian set khatnaah khan ace vawisarih vawtlain, tun season WTA-1000 tournamene bik ace ngah ber ni reng world number five Elena Rybakina a hmakhalh ta a ni.
Australian Open final telin Sabalenka hian a hmaa vawithum ngawt Paris Olympics gold medallist Zheng a lo hmachhawn tawhah pawh a la hneh fai vek a, Pathianni final-ah pawh tualchhung mi zawk ni chungin Chinese nula khan world number two a ngam lo leh ta a ni.
Zheng-i hian 2012 Cincinnat title latu leh a idol ni bawk Li Na hnungzuia Chinese player zinga WTA-1000 title la thei pahnihna nih a tumna chu a ngam loh laklawh Sabalenka vang bawkin a puitlin zo leh ta rih lo a; Belarusian hian kum kal laia a title palina a sualchhuah rualin Wuhan hnehna kha a career-a singles title 17 a hui tlinna chiah a ni.
A zawna Wuhan Open title vawithum la tling thei awmchhun Sabalenka hian season kal laia chawlhkar tawp lam la awm hmangtangkaiin top ranking luahkir leh ngei a tum chho mek a; tun dinhmunah hmeichhe tennis season kharna tournament lian season-ending WTA Finals khel turin world number one Iga Swiatek nen an tling tawh a ni.
Wuhan lalnu Sabalenka
