China President Xi Jinping chuan tunkar hian Moscow tlawh dawnin Russian president Vladimir Putin nen inbiakna an nei ang tiin official te chuan an sawi a.
Kremin chuan ‘inzawmna leh inthianthatna chungchang leh thawho zel dan tur an sawi ang’ tiin a tarlang a. Russia than Beijing in Ukraine indona tihtawp a nih theih nana rawtna a siam leh khawthlang ram tena an uksak lemloh hnu lawkah Xi Jinping hian Moscow a pan dawn a ni.
Khawthlang ram te chuan Beijing chu Moscow hnneah ralthuam pe lo turin an lo vau lawksa tawh a.
Tun hi President Xi an Russia in Ukraine a run hnua Russia a tlawh hmasak ber a ni dawn a, Thawhtanah Putin nen chhun chaw ei dunin Thawhlehni ah an titi zui dawn a ni.
China chuan Ukraine indona chungchangah awmze nei leh dik leh fel taka thlirna a kalpui zui zel ang tia sawiin hei bakah hian inremna chu a dah pawimawh ber a ni a ti bawk.
UK Prime Minister Rishi Sunak thupuangtu chuan China-in Ukraine sovereignty humhim a nih theih nana hmalakna tak tak a kalpui a nih chuan lawmawm tak a ni ang tiin a sawi nghal bawk a.
Chinese leader-in Russia a pan tur hi Beijign in Moscow a thlawpna lantirna zawka ngaih a ni thung a. Putin leh Xi hian khawvel thilah thlirdan inang an nei tia ngaih niin an pahnihin multi-polar world duhtu an ni.
Nikum khan ram pahnih hruaitu lawk pahnih chuan an inzawman chuan tawp chin nei lo tiin an puang dun a, a tak ramah erawh chu chu thil nihna dik tak a ni hauh lo thung.
Tun thlengin China chuan Russia hnenah hian Ukraine beihna tur raltuam hlauhawm a la pe lo nia ngaih a ni a, mahse, US chuan ralthuam hlauhawm pek erawh a tuma ti thung a.
Russian economy hi China economy China economy lakah chuan nau taka nih avangin Moscow chuan junior partner dinhmun a chelh zawk tih a ni bawk. Hei vang hian Chinese sorkar chuan Russia ah sawi a nei thei viaua ngaih a ni bawk.
Thawhtannia ram pahnih hruaitute inhmuhna hun hi US in Iraq a run kum 20-na a ni chiah dawn bawk a, US in Iraq a run kha China leh Russia te chuan an thlawp lo ve ve a ni.
Chutih laiin China chuan diplomatic lamah hlawhtlinna turu tak nei zo hlimhlawlin Middles East rivals Iran leh Saudi Arabia tena diplomatic relations an neih theih nan hlawhtling takin hma a lak hlimhlawl a ni bawk.
Mahse Ukraine indona chungchangah neutral a nih thu sawi tlat thungin Ukraine indona hi a kal rei poh leh khawthlang ram te resource leh sum luangralin Russia pawhin puihna mamawh tial tialin chuta hlakwna changtu ber tur chu China a ni tih a ni bawk.
China chuan Ukraine indona tihtawp a nih theih nan point 12 siamin hma la a, mahse, chutah chaun Ukraine atangin Russia sipaite an inhnukdawk tur a ni tih tarlan a ni lo thung.
February thla khan Ukrainian president Volodymyr Zelensky chuan Xi nnea inhmuh a duh thu sawiin, “China hian Russia hnenah raltuam a pek duh ka ring lo takzet” tiin a sawi a. US media te chuan Xi leh Zelensky te chu Xi-an Moscow a tlawh hnuah phone-in an inbe dawn tiin an sawi.
President Xi an Russia a tlawh hi khawvel hriata Russia-in thian a nei tih lantir tumna tia sawi a ni tho bawk a. Ukrainian foreign minister Dmytro Kuleba chuan, “China leh Russia te hi inthiantha an ni a, chuvang chuan che tha lem lo tak Russian leader chu Chinese leader in a tlawh phah a ni,” tiin a sawi thung a. Hei bak hi chu Ukrainian leader te atangin sawi engmah an la nei lo thung.
Xi Jinping-an Vladimir Putin hmu turin Moscow khawpui pan
![](https://theaizawlpost.org/wp-content/uploads/tap_logo-min-large.jpg)