Yamal-a hat-trick hmasaber hmin ve ta nge nge
4-1 tehrenga mikhual Villarreal an sawp zanah Barcelona rawlthar kum 18 mi Lamine Yamal chuan a career-a a hat-trick hmasaber a nghak chhuak ve ta nge nge a, Spanish La Liga table-a Barca hmahruaina pawh a chhah belh sawt.
Barcelona hian point 64 neiin, an hnuai chiaha pahnihna luahtu Real Madrid-in point 60 an hum a, zanin hian home game-ah Getafe an mikhual dawn a, an chak chuan Barca nena an inkar hlat zawng chu a ngai angin an pawtzim zui leh thei ang.
Inrinni zana Nou Camp atanga point hawn zo lo Villarreal erawh point 51 an neih tawh hmangin pathumnaah an la thu chhunzawm hram hram.
Hat-trick siamtu Spaniard mihang goal hmasa pahnih kha first half-a lut niin, second half tir lamah a lungthu kimna a khung leh a; Barcelona goal lina erawh hun pekbelha substitute Robert Lewandowski thawh a ni thung.
Villarreal goal khat neih chhun hi second half minute 49-a Senegal midfielder Pape Gueye thun niin, hei hian mikhual team-ah phurna han siamsak deuh dawn mah se a chhunzawmna lam a awm thei ta lo a ni.
Yamal-a goal hmasa pahnih hi minute kaw chhunga a tihluh niin, Fermin Lopez-a siamsak ve ve a ni a; second half-a a goal khat thawh leh nen kum 18 leh ni 230 chiaha upa ni chunga goal thum a thun hnuah Spain international kha tun kum za bi kal meka La Liga bika hat-trick siam thei naupang ber tiin statisticians Opta lamin an chhinchhiah.
Mikhual Villarreal kha Nou Camp-a an tlawm hmaa an game khelh hnuhnung paliah vawi thum ngawt an chak tlin vangin an chunga awm thin Atletico Madrid lehpelin pathumnaah an chho a; tun dinhmunah point kua laiin pahnihna Real nen an inthlau.
Inkhelh banah Yamal chuan Movistar Plus hnathawk hnenah an tumpuite chungchang sawiin, team tha tak an nih thu leh khati chunga goal thum a khung thei hlimawm a tihzia hahipin a sawi.
Inrinnia Spotify Camp Nou inkhel kha a hmunah mipui 44,256-in an chhim a, he khelmual lian zeta entu mipui an la tam tawk theih loh chhan hi thutna an la peih fel loh vang a ni.
Yamal-a hat-trick hmasaber hmin ve ta nge nge
