Yemen atanga drone thlawh chhuahtir avangin Israel chhim lamah mi 20-in hliam an tuar niin Israeli sipaiten an sawi.
Israel Defense Forces (IDF) chuan drone hian Red Sea kama chawlh hmanna khua, Eilat a fuh a, pawi a khawih hmain kah thlak tum a ni tih an sawi.
Magen David Adom emergency medical service chuan Yoseftal Hospital-ah hliam 20 dah luh an ni a, an zinga pahnih hian na tak an tuar tih an sawi.
Israeli chanchinbute chuan Houthi chetna niin an tar lang a, Yemeni pawl erawh hi chuan an tih a ni tih an la sawi lo.
Israeli TV station-ten live footage an tihchhuahah chuan drone-in a fuhna laiah hian mei khu a zam nasa hle tih a lang.
Social media-a video darhah pakhatah chuan drone hi van sangah thlawkin a thlawk liam a, in lian tak phenah a puak zui tih a hriat theih.
“IDF sipaite chu Israel Police nen Eilat-ah UAV hmanga beihna a thleng tih an dawn avangin an kal nghal,” tiin IDF chuan thu an chhuah.
Sipai leh police hian a bul hnaia chengte insaseng an pui a, helicopter hmangin hliam tuarte thiar chhuah an ni bawk tih an sawi.
Sipaite hian alert an dawn chuan minute 10 chhungin hmun himah tlan hman zel turin an ti a. A hmain khaw pumah air raid siren an tiri bawk.
Tuna thil thleng hi Houthi-te tih a nih chuan hliam tuar zata tehin an chetna na ber a tling ang.
July, 2024 khan drone hmanga Tel Aviv-a US embassy branch office bul maia apartment building an beihnaah mi pakhat thiin mi dang 10-in hliam an tuar bawk.
Eilat hi khualzinte tlawh nasat tak khua niin tun hnaiah drone-a beih a tawk zauh zauh va, kar hmasa khan khualbuk beih a ni tawh a, thi leh hliam erawh an awm lo hlauh niin Israeli thuneituten an sawi.
September thla tirah khan Eilat hmar lam hreta Ramon Airport chu Houthi-te drone-in a fuh tawh bawk.
Hel pawl, Houthi hian Gaza-a Israel leh Hamas indona kal mekah Palestinian lam an tang tih lantir nan Israel hi missile leh drone-in an kap fo va. Gaza-a indona a chhuah atangin Red Sea-a lawngte an bei fo bawk.
Iranian-te thlawp pawl, an hmelmaa Israel chhaltu hian Sanaa leh Yemen hmarthlang an thunun a; mahse, ram dangten sorkarah an pawm lo.
Israel hian Yemen-a Houthi thunun lai leh Red Sea lawngchawlh hmun, Hudaydah a lo kap ve tawh a. September thla tira an beihnaah hian Houthi hnuaia health ministry chuan Israel-in Sanaa leh al-Jawf province an kahnaah hian mi 35 an thi niin a sawi.
August thla tir khan prime minister atana an hman, Ahmed Ghaleb Nasser al-Rahawi chu Israeli thlawhnain a kahnaah a thi tih an sawi bawk.
Yemen atanga drone thlawhin Israel-ah mi 20 hliam
