Yemen-in US beihna an chhang let

Yemen-in US beihna an chhang let
Yemen-a Houthi-te chuan Inrinnia US-in thlawhna hmanga an beiha mi 31 vel an thihna chu an chhang let a, ‘beihna chu beihna vekin’ an chhang let tih an sawi.
Houthi sipai thupuangtu, Yahya Saree-a chuan Pathianni khan an pawl hian US aircraft carrier USS Harry S Truman leh an indo thlawhnate chu ballistic leh cruise missile 18 leh drone-in an bei tih sorkar TV Al Masirah chuan a puang a. US erawh chuan engmah a la sawi lo.
Saree-a hian US khan Yemen-a hmun hrang 47 chuang an bei niin a sawi bawk.
A hmain Houthi political bureau chuan beihna an tawh chu ‘dan bawhchhiatna’ tiin a lo sawi tawh bawk.
Houthi health ministry thupuangtu, Anis Al-Asbahi chuan Inrinnia beihna an tawhah khan an khawpui, Sanaa leh Saada, Al Bayda leh Radaa beih a ni a, mi 31 vel thiin mi 101 an inhliam a, ‘a tam zawk hi hmeichhia leh naupang an ni’ tih a sawi.
US President Donald Trump chuan Houthi-te hian Red Sea-a lawngte an beih an tawpsan hma chuan an bei zel dawn tih a sawi.
Houthi hian Israel-in kum 2023-a Gaza-a Hamas a beih hnuah Palestinian-te an thlawpna lantir nan bungraw phur lawngte an bei a. Pathianniah vek khan ‘Gaza-a danchah a niha puihna a luh hma chuan tuipui hi an bei zel dawn’ tih an sawi bawk.
Houthi hian January-a Gaza-a inkahhai puan a nih hnuah khan lawng an beih hi an tawpsan a, thla hnih an chawl tawh.
March thla tir khan Israeli Prime Minister Benjamin Netanyahu-a chuan thawh hnihna kalpui lova Hamas-in inkahhai thawh khatna pawt sei an duh theih nan Gaza-a puihna luhtir hi a khap.
Thawhlehni kal ta khan Houthi hian Gaza-a puihna thawn lut leh tura Israel an tihna hun tiam an pek hnuah pawh an la luhtir loh zel chuan lawng an bei zui leh dawn tih a sawi.
Pathianni tuk khan US Defense Secretary Pete Hegseth chuan Washington hian US bungrua leh khawvel thil phurhna an beih zel chuan Houthi hi an bei zel dawn tih a sawi.
Fox News-in an kawmnaah Hegseth-a chuan November, 2023 atanga lawng an beih chuan an bei ve zel dawn a, Iran pawh Houthi an puihna titawp turin a ti.
US leh a thawhpui ramte chuan Yemen hi cruise missile hmangin January, 2024 atang khan an bei fo tawh a. Israel pawhin an ram an beih avangin a kap ve bawk.