Lawngtlai district-a tlawmngai pawl lian ber, Young Lai Association (YLA) chuan September 23 khan an kum 50 tlin, Golden Jubilee an lawm.
YLA Golden Jubilee-ah hian Lai Autonomous District Council chief executive member C Lalmuanthanga, Lawngtlai East MLA Dr Lorrain Lalpekliana Chinzah, Lawngtlai West MLA C Ngunlianchunga bakah mi pawimawh dangten YLA chu duhsakna hlanin chibai an buk a. Central YLA president HC Vanlalruatpuia chuan Jubilee thuchah a tichhuak bawk.
Central YLA hruaitute chuan YLA Day pual hian Lawngtlaia damdawi in pathum bakah Lairam Rescue Centre, Lairam Motherless Home leh District Jail-ah thilpek an hlan a, Thawhtanni zan khan hmun hrang hrangah Jubilee mei det a ni.
YLA Day hi branch hrang hrangin intihhlimna, khawtlang tana thiltha tihnan, mi hmingtha chawimawi nan, midang tanpui nan leh infuihtharna atan an hmang a. YLA-ah hian Sub-Hqrs 7, Group 2 leh Branch 119 awmin, member 56000 an awm mek.
YLA-in kum 50 a tling
