Lawngtlai district-a tlawmngai pawl lian ber, Young Lai Association (YLA) kum 50 tlin, Golden Jubilee kum 2024 chhungin lawm a ni dawn a, Thawhlehni khan Lawngtlaia Areopagy-ah khuhhawn a ni.
Central YLA president HC Vanlalruatpuia chuan kumin chhunga YLA Golden Jubilee lawmna hi a hawng a. Central YLA president lo ni tawh H Zothangliana pawh telin, aia upa zah chu YLA member-ten chawinung thar leh se a duh tih a sawi. Zirna kawngah tun aia nasa zawka thalaite ke pen tura chahin, ramngaw leh lui leh nungchate chu humhalh an ngai takzet tawh tih a sawi a; hemi atan hian YLA member zawng zawngte thahnemngai turin a sawm a ni.
He hunah hian Central YLA hruaitu lo ni tawh thahnem tak an tel a, branch hrang hrang atangin items neih a ni.
Central YLA general secretary Joseph Lalhmingthanga Chinzah report danin, YLA hi 1974 September 23-a din a ni a, tunah hian Sub-Hqrs 7 leh Branch 116 neiin, member 55760 an awm a ni.
YLA Golden Jubilee hi kumin kumtluana lawm tum a ni a, May thla chawhnu lam atangin Inter Branch Football Tournament neih a ni ang. October-ah branch zaipawl leh hnam lam intihsiak a ni anga, YLA din ni – September 23-ah branch zawng zawngin jubilee lawm tura ruahman niin, November-ah ni thum chhung jubilee lawmna puiber Lawngtlaiah neih tum a ni.
YLA kum 50 tlin lawm tan
