YMA a awm chhung chuan khawi hmun ami pawh nise, Zofa unau harsatna tawkte YMA chuan a pui dawn a, ruihhloa inhmang leh misual erawh an dim dawn lo tih Central YMA president R Lalngheta chuan a sawi.
Kuki zaithiam leh hlaphuah thiam, tunhnaia Manipur-a buaina kaihhnawiha inkahnaa nunna chan zinga tel LS Mangboi (L) hla phuah “Kan Ram a ni e” tih music video siam chu Nilaini khan Aizawlah minister R Lalzirliana’n a tlangzarh a. He huna tel Central YMA president chuan kan unau, khawi hmunah pawh harsatna tawkte chu YMA a awm chhung chuan kan tanpui dawn a ni tiin, chutihrualin ruihhlo lama inhmang leh misual chu an dim dawn lo tih hre turin a chah tih a sawi.
Zofate buaina chu a lungchhiatthlak rualin Pathianin zaikhata kan luanza theihna tura a remruat a ni zawk tih an hriat chuan lawmna tur a awm tih a sawi a. “Zohnahthlakte kan inpumkhatna tur hian Central YMA chuan theihtawpin hma a la mek zel a, he hla hian inpumkhatna lamah min hruai se, chi bil leh hming tesepa buai loin, Zofate inpumkhatna hmahruaitu ni ngei se,” a ti.
Mahni tawng bil chu vawnnun reng a ngaih rualin, kan thinlung a inhnaih a, kan inpawh lehzual nan ‘common language’ tuna hman mek Duhlian tawng chu thiam tlan a ngai tih a sawi bawk.
YMA awm chhung chu kan unau harsate kan pui dawn – R Lalngheta
