Aizawl khawpui leh a chhehvela khelh mek LBS Suzuki 21st Inter Branch YMA Football Tournament chu a hmawr bawk a hnai chho zel a, tun dinhmunah quarter-final lut a hriat kim tawh a, vawiin, Thawhtanni hian semi-final lut tur zawnna match li khelh chhunzawm leh a ni ang.
Quarter-final thleng zo lo langsar zingah he tournament chanchina team hlawhtling ber Armed veng leh Aizawl khawpui pawn atanga champion awmchhun Lengpui an tel a; Republic veng leh leh nikum lama boruak neilian Sialhawk an tla fel tawh bawk.
Team pariat la dam zingah Durtlang hi champion tura rinkai zingah telin, he team-ah hian Indian Super League leh I-League team-te inelna Hero Super Cup-a Odisha FC champion-puitu midfielder Isaac Vanmalsawma leh Hero I-League season 2022-23 champion RoundGlass Punjab FC defender pawimawh Hming-thanmawia (Valpuia) telin, tuntum YMA football-a Durtlang tha tichaktu langsar zingah an tel me, a ni.
Quarter-final lut team pariatte chu – Venghnuai, Tlangnuam, Khawzawl Vengthar, Durtlang, Bawngkawn, Be-thlehem Vengthlang, Hualngohmun leh Salem Veng niin, Aizawl pawn YMA branch atangin team pahnih an la inhamtang.
Karliamta Zirtawpni khan round of 16 inkel pakhatah Khawzawl Vengthar hian Aizawl pawn team ve bawk Thingsulthliah Joint YMA team lakah 3-0 hnehna changin, a tuk, Inrinniah Hualngohmunin hun pangngaia goal a luh loh hnu penalty petah 5-3-in Lengpui an petchhuak ve bawk.
Vawiin quarter-final inkhel
AR Lammual
11:00AM Khawzawl Vengthar vs Bawngkawn
1:30PM Durtlang vs Tlangnuam
RG Stadium
11:30AM Venghnuai vs Bethlehem VT
2:00PM Hualngohmun vs Salem Veng