Mizoram larsap Gen. Vijay Kumar Singh (Retd) chuan YMA chu midangte rawngbawl sak kawngah a khaipa ber a ni tih a sawi.
Thuchah siamin larsap hian, Young Mizo Association din champha vawi 91-na pualin YMA leh a member zawng zawng duhsakna a hlan tih a sawi a. YMA chu khawtlang, hnam ziarang leh nunphung chawilar leh tihhmasawn kawnga Mizorama tlawmngai pawl lian ber a ni a, din a nih atanga vawiin thlengin midangte rawngbawl sak kawngah a khaipa ber a ni tih a sawi.
Tanpui ngai tanpui, Mizo hnam ziarang, nunphung leh rohlu chhawmnun leh chawilar kawngah YMA-in theihtawp a chhuah leh, sawrkar hmalakna a hlawhtlin theihnan leh zau zawka a thlen theihnan tha taka a tawiawm thin chu fakawm tiin, chhawmnung zel turin a chah.
YMA Day pualin Mizo mipui chu an thil tihna apiangah tlawmngaihna lantir thin tura chahin, mahni inphat a, lainatna leh midang tana inpekna nunpui tlat turin a sawm a. Hnam bil hrang hrang inkara inunauna chawilar a, aia upa zah leh mahni hnam tobul nghet taka vuan a, ruihhlo leh a kaihhnawih laka inthiar fihlim tur leh thalaite hmakhua ngaia theihtawp chhuaha tangruala do let turin a chah bawk.
Larsap chuan Mizoram mipui leh ram pum hamthatna atan YMA chuan sawrkar leh khawtlang huap pawl dang nen tha taka hma an lak ho zel a beisei tih sawiin, YMA kalzelna turah duhsakna a hlan tih a sawi a ni.
YMA hi midang rawngbawl sak kawngah a khaipa ber – Larsap
