YMA leh Mizo hnam, tih chu lakhran theih a ni lo deputy chief minister Tawnluia chuan a sawi a. Hnam ziarang leh nunphung humhim zel tum tur leh zahpui loa ngaihlu deuh deuh turin YMA member-te a fuih.
June 15 – YMA Day kha Tuichang bialtu MLA, deputy chief minister hian Khawhai Branch bakah Khawzawl Vengthar Branch-in a hrang ve ve an hman chu a hmanpui a. Hnam nun zemawi chhawmnungtu leh sulsutu a ni leh chhiat that nikhuaa tumah enhrang bik loa YMA-in hma a la thin chu ropui a tih thu a sawi a. Mizo hnahthlak hnam, tlang hrang hranga awmte innghahna leh inpui Mizoram enkawl leh chawimawi kawngah thalaiten mawhphurhna an nei, tiin, “Humhimna zawnga Zohnahthlak min rawn pantute tuamhlawm leh kuangkuah kawngah theihtawp chhuah tlan zel a pawimawh a, hei hian hnam inpumkhatna leh inunauna nasa zawk a siam dawn a ni,” a ti.
YMA leh Mizo hnam, tih chu lakhran theih a ni loa, hnam rilru leh hmangaihna tak tak a awm loh chuan hmasawnna dik leh tlo a awm thei lo, tiin a sawi a. Thalaite chu hma sawn zel thei tura rualelna dik neih tum tur leh thiamna neih belh zel tura ngaihtuahna seng zel turin a fuih.
YMA Khawzawl Vengthar Branch hian Tuimuk lui bul NH-06 kawngpui kama YMA Day pual thingphun hnatlang neiin, deputy chief minister hian a hmanpui a. YMA Day pual thil tha tih lantirna thingphun hnatlang neih a ni chu inhmeh a tih thu leh Khawzawl Vengthar Branch-in Tuimuk lui dung nungcha an humhalh chu fakawm a tih thu a sawi a. Sawrkarin luidung nungchate bakah tui humhalh a duh thu leh tuihna humhalhna dan hman theiha a peihfel thu a sawi a. Sik leh sa danglam zelah tuihna a kiam ve zel thu sawiin, thalai rualte chu tuihna humhalh tura thingphun uar tur leh enkawl zui zel tur te, luidunga cheng nungchate humhalh kawnga thapui thawh zel turtein a chah a ni.
YMA leh Mizo hnam lak hran theih a ni lo – Tawnluia
