YMA table tennis hmeichhe champion Tebawihi
LBS Suzuki Inter Branch YMA table tennis singles-ah harsatna lian tawk loin Lalthansangi Sailo (Tebawihi) a champion a, Armed Veng tanpuiin hmeichhe team-ah an champion bawk.
Zirtawpni zan khan Hawla Indoor Stadium, Republic Vengthlangah Armed Veng nula Tebawihi’n hmeichhe singles final-ah set hloh loin Vanlalnghaki, Bazar Veng Lunglei a hneh a, inkhel thunun tluan zakin 11-5, 11-7, 11-2, 11-4-in a chak.
Mizoram number one Tebawihi hian inbuatsaihna ang maiin Nghaki lakah nuam ti takin a khel a, point hmasa ber atanga hnuhnung ber thlengin hma a hruai tluan zak. A theihna dik tak lantir tur khawpin Mizoram number six Bazar Veng Lunglei nulain a beilet zo lo a, chungnung takin a champion a ni.
Hmeichhe team final-ah Tebawihi’n Armed Veng tan hmun pawimawh luah zuiin, singles vawi hnih leh doubles tum khat a khelhah hnehna a chang vek a, Mission Vengthlang lakah 3-1-in an champion.
Singles hmasa berah Mission Veng-thlang nula Jenny Liansangpuii’n a tirah point hnih hmu zawn nghal mah se Tebawihi’n tha tak taka a vuak dik thin hmangin a beilet a, rilru lam inbeihnaah a bitum thunun telin, set hmasa ber 11-9-a a lak hnuah awlsam takin 11-1, 11-4 hnehna a chang zui a ni.
Singles thawh hnihnaah a kawppui Lalbiaknii a tlawm ve thung a, Mission Vengthlang player beiseiawm Malsawm-tluangi’n set hloh loin a hneh. Team pahnihin game khat ve ve an lak hnuah champion turin doubles-a chak zawk nih a pawimawh.
Armed Veng tan player tawn nei tam pahnih Tebawihi leh a vanglaia Mizoram number one ni tawh Biaknii an tangdun a, Mission Vengthlang tleirawl pahnih Sangpuii leh Sawmtluangi’n set hmasa ber an lak hnuah Armed Veng an insiamtha.
Tebawihi’n langsar taka a khelh bakah hun pawimawhah tawnhriat an neih chhawrin anni aia kum lama naupang zawk lakah hriam zawkin an inlan a, inhnektawk taka set nga an inkhelh hnuah 7-11, 11-9, 11-6, 9-11, 11-7-in an chak a, 2-1-in hma an hruai zui.
Singles thawh thumnaah Armed Veng innghahna Tebawihi’n 11-9, 11-2, 11-9-in Sawmtluangi a hneh a, set thumnaah Mission Vengthlang nulain 9-7-in hmahruai hman mah se tihsual pawi tak a neih bakah a paukhauh tawk lo.
Tebawihi’n 10-9-a hma a hruai let hnuah nalh takin a vaw tla a, singles leh team title la kawp chungin ropui takin championship a khar.
Hmeichhe team inelnaah YMA branch hrang 16 an tel a, hmeichhe singles-ah player 49 an chhuak.
YMA table tennis hmeichhe champion Tebawihi
![](https://theaizawlpost.org/wp-content/uploads/2023/04/tenis.jpg)