Young Men Christian Association (YMCA) Aizawl chuan Thawhlehni khan Aizawlah World Peace Day 2024 an lawm. Peace Day hmanpuitu chief minister Lalduhoma chuan khawvel history-ah indo chanchinin hmun a luah tam hle a. Bible-ah pawh indona thu a tam hle, tiin, “Indona a lo irhchhuah chhan chu eng pawh nise, a hmawr bawkna erawh dawhkana inbiakna hmanga chinfel a ni deuh zel thin. Indopui II-na kha Treaty of Paris inremna ziah a ni a, Indopui I-na pawh Treaty of Versaille hmanga chinfel a ni. Hei hian ralthuam hmanga inbeihnain remna a thlen zo lo tih leh innghirnghona hi inbiakna hmanga chinfel theih a nih zia a tilang,” a ti.
Buaina hmunah hmasawnna a kal thei loa, Mizoramin kum 20 chhung rambuai a tawrh tawh atangin chu chu kan hmu tih Lalduhoma hian a sawi. “Kan ram leh hnam hian hma sawn zel kan duh a nih chuan, remna leh muanna kan tungding tlat tur a ni,” a ti.
YMCA Aizawl president Dr R. Lalthangliana chuan chief minister apiang hi an ex-officio patron an ni, tiin, a telpui theih avangin lawmthu a sawi a ni.
Central YMA general secretary Prof. Malsawmliana chuan thupui “Building a Just world – Justice, Peace, Equity & Human Rights for All” hmangin thu a sawi a. YMCA Aizawl honorary general secretary Er K Lalsawmvela’n World Peace Day an hman chhan leh an hman dan tlangpui a sawi a ni. YMCA NE India Region regional secretary Shamir J Thabah pawhin a rawn hmanpui a ni.
United Nations chuan International Peace Day atan September 21 a hmang a. YMCA hian Indopui II-na laia Hiroshima-a atom bomb thlak ni khan World Peace Day atan an hmang ve thung.
YMCA-in Peace Day hmang
