Sports & Youth Services Department leh Mizo Zirlai Pawl tangdunin thalaite tana ‘Youth-20 Meet on Nationalism, Patriotism & Development’ an buatsaih ni hnihna chu Nilaini khan Aizawlah neih leh a ni.
He hun hmanpuitu I&PR minister Lalruatkima chuan ram leh hnam hmangaihna rilru chu a dik lo zawnga kalpui theih a nih avangin kan ngaihtuahna a fim a tul, tia sawiin, “Khawvelah hnam tam takin ram mumal nei loa an awm laiin, keini chuan ‘ram’ tia chhal tur kan pi leh puten min lo sahthlak saka min lo humhalh sak tawh kan rochun a, he ram kan thlahtuten luchhum banchhum huama an lo humhalh hi kan chan tur a ni loa, kan humhalh tlat tur a ni,” a ti.
Khawvelah hnam tam tak an lo ral tawh a, damkhawchhuak tur chuan kawng engkimah kan in fit a tul tih a sawi a. Zawmthaw leh ngaihsam taka kan awm chuan kan la inchhir dawn a ni, tiin, kan hnam leh ram chu ropui taka a dinchhuah theihna’n thalaite chu ram leh hnam hmangaihna rilru pu chunga theihtawp chhuah tur kan ni, tih a sawi bawk.
“Ramin ri nei mah se, hnamin ri a nei loa, Zohnahthlak tawh phawt chu zai khata kan luan a pawimawh takzet. Chhulkhat chhuak kan nih avangin Myanmar, Manipur, Tripura leh Bangladesh a kan unaute tahna hi kan tahna a ni a; an tawrhna hi kan tawrhna a ni,” Lalruatkima hian a ti.
Khawvela dingchhuak tur chuan kan tanrual bakah kan tam a ngai, tiin, hnam zahawm ni a dingchhuak tur chuan kan tam a tul a, mipate pawh innghahna tlak ni turin tun ai hian kan tan lehzual a ngai tih a sawi. “Inchimralna chi hrang hrang a awm a, chu’ng zingah chuan population assimilation hi a hlauhawm ber avangin Mizote kan inthlahpun a tul a, ram leh hnam hmangaih tura zirtirna dik leh tha nen kan inkaihhruai a ngai,” a ti.
Youth-20 Meet ah hian MZP adviser Lalhruaitluanga Chawngte chuan keynote address a pe a. Resource person pathumin presentation an pe. NP-NCD state program coordinator Dr Martin Chawngsailova chuan cancer chungchanga thalaite hriat tul a sawi a. Social media hman dan leh cyber crime chungchang ICT informatics officer Lalengzuala’n sawiin, Administrative Training Institute faculty Golda Dell Zohmangaihi’n personal empowerment chungchang a sawi a ni.
Youth-20 Meet neih zawm
