Mizorama reality TV show, zaithiam thlanna/ intisiakna kan neih hmasak ber Youth Icon chu kumin LBS Suzuki Youth Icon tiin an nei leh ta a, mi 453 telin, 270-in audition round an paltlang a, September ni 10-ah round hmasa ber an tan ang.
Audition-ah mi 453 an inlan a, audition hi social media platform WhatsApp leh Telegram kaltlanga neih a ni a, Mizoram chhung atanginmi 440 an tel a, Tripura, Manipur, Mumbai leh rampawn Myanmar leh Oman atangin mi 13 an tel a. Audition-ah hian video clip an thehlut a, chuta tang chuan round sang zawka inlan tur an thlang ta a ni.
Mi 272-ah hian Mizoram district hrang hrang atangin tling an awm vek a, Aizawl atangin 139, Mamit atangin 26, Serchhip atangin 25, Saitual atangin 19, Champhai atangin 16, Kolasib atangin 15, Lunglei atangin 10, Lawngtlai atangin 8, Siaha atangin 4, Hnahthial leh Khawzawl atangin pathum ve ve leh Mizoram pawn atangin pali an awm.
Round hmasa ber hi September ni 10-ah LPS Studio-ah neih tan a ni ang a, September ni 21 zanah result puan a ni ang. Top 10 finalist ten October ni 5 atangin intihsiak an tan ang a, October ni 19-ah grand finale neih a ni ang.
Youth Icon hi tum ruk thlan a lo ni tawh a, a hmasa ber Zoramchhani (2006), Malsawmtluangi Fanai (2007), R Lalhmangaiha (2009), H. Lalrempuia (2012), K Lalthlamuankimi (2016) leh Zothanpuii (2019) ten Youth Icon nihna an lo chelh tawh a ni.
Youth Icon Season 7-ah 453 tel
