Site icon The Aizawl Post

Youth Representative of India-ah intihsiaka titha zingah Mizo nula

Youth Representative of India-ah
intihsiaka titha zingah Mizo nula
Viksit Bharat Young Leaders Dialogue 2025 neih zawh takah Mizoram aiawha kal Grace Lalrinpari Hauzel chu a titha zual pahnihah a tel.
Sawrkar laipui Department of Youth Affairs buatsaihin January 10-12 chhung khan New Delhi-a Viksit Bharat Young Leaders Dialogue 2025 hi neih a ni a. Tunhma kum 25 chhunga National Youth Festival an lo hman thin thlakna niin, Prime minister Narendra Modi chuan kum 2024 India Independence Day-a a thusawia thalai, political party-a telna nei lo mi nuai khatte politics-a hman tangkai a, developed India (Viksit India) atana an ngaihdan an thawh ve theihna tur remchang siamsak a tih nena inzula ruahman a ni.
Prime minister hian he thalai inkhawmpui hi telpuiin, zalen taka inkawmna hun tha leh remchang a awm theihna turin chawchhun a kilpui nghe nghe a. Thalaite pawhin an ngaihdan, an duhdan leh a taka an tawnte tlang takin an sawi a. Hei hi ram rorelna kawnga thalaite inhnamhnawih tir leh mawhphurhna nei nia inhria a, neitu chan chantir tumna pakhat a ni.
Tun tuma telte hi state hrang hrangin anmahni state theuha inelna hrang hrang buatsaih a an thlan te an ni a, a team angin inelna hrang hrangah an tel a, mimal-tin pawh an tih that dan uluk taka en a ni.
Mizoram atang hian team li an kal a, an vaiin mi 12 niin, chu’ng zinga paruk chu Pachhunga University College zirlai an ni a. Pachhunga University College history department-a fourth-semester zirlai Grace Lalrinpari Hauzel d/o Lalsangzela Hauzel, Khatla hi inelna hrang hranga titha ber zing ami niin, ‘Youth Representative of India’ atana mipa leh hmeichhia an thlanah a tel a, India ram thangtharte aiawh tlaka ngaih a ni. Prime minister telna inkhawmah thu sawitir a nih bakah dawhkan khatah chawchhun kilho tir a ni.
Chief minister Lalduhoma chuan Viksit Bharat Young Leaders Dialogue 2025-a intihsiak hautak tak, stage hran hran paltlanga, candidate nuai chuang zingah Mizo thalai titha ber nihna lawmman a dawng chu Mizo hnam tan beiseina leh chakna thar min petu a ni, tiin, Grace Lalrinpari Hauzel leh a chhungte, a zirtirtute a lawmpui takzet tih a sawi a ni.

Exit mobile version