Mizoram Police constable 259 laknaa mawhphurtu police officer-te zaa za-in an hna lak danah an ‘fair’ tih finfiahna neia an inngaih thu home minister K.Sapdanga chuan tunhnai khan a sawi a.
Hna lak dana ‘zaa za fair’ tih tawngkam hi Mizo mipui ten kan hriat lohna a rei ta hle a; a nihna takah chuan, tunhma khan sawrkar hna lak danah, ‘zaa za fair’ tih tawngkam huai taka phuh chhuak ngam kha an awm em tih pawh ngaihtuah tham tak a nih a rinawm.
Tun tuma police lakna hi a fair thawkhat ang tih a rin theihna chu, hetiang hnalakna thila rintlak nia sawi hlawh tawh ‘Infoclab Solutions Private Ltd Delhi’ ami rawih a ni te, radio frequency identification (RFID) leh biometric identification technology hmanga PET (Physical Efficiency Test) te, PST (Physical Standard Test) te, interview leh written examination te endik a ni leh, mithiam ten optical mark recognition (OMR) system hmanga written exam an endik te hi tunhmaa kalpui ngai loh niin a lang.
Mizoram police zingah zu leh ruihhlo avanga buai leh nunna chan phah an awm thin thu chanchin tharah te kan hre thin a. Ram leh hnam venhim hna thawk turte chu rilru leh taksa ‘fit’ tha tak an nih a ngai a, chutiang mite chu thlan tur an nihzia pawh kan hre vek awm e. Tunhma khan police lakna kha a lo ‘fair’ lovin, rilru leh taksa fit tha lote pawh an lo la mai mai thin a ni ang tih a rin theihna chu, zu leh ruihhlo avanga buai leh nunna chan phah an awm thin dan atang hian a ni. A lo fair viau thin a nih pawhin, a hnua fair lo zui thei ta chu, ‘Mizoram Police discipline hi a lo chhe viau a ni ang’ tih ngaih dan a piang thei tho a ni.
A fair hi a lawmawm e; mahse, police/sipaite chu rilru leh taksa fit tha tak an ni reng tur a ni tih a nih laia, zu leh ruihhlo thihpui an tam hle thin a nih chuan, kan police department pawh hian, hna lakna fair taka an kalpui ang tho hian, a hnu lamah zu leh ruihhlo avanga buai zui mai mai lo tur hian discipline hi an kenkawh that a pawimawh hle a ni tih hi intuaithar nan hmang thei se a duhawm hle a ni.
Za-a za ‘fair’…. mahse…
