A chanchin ziaktute’n talented left winger an tih thin Zagallo hian Brazil World Cup trophy hmasaber a lakpui bakah manager ni chungin a ram a champion-pui leh thei ngat a; Brazilian fans lamin an ngainat em em chhan chu ngaihtuahna hmang thiam chungchuang a nihna leh hnam hmangaih rumrut a nihna hi a ni.
A telna team tawh phawt tana hnehna chang tur renga piang a ni tih a sawi thin a, a khelhna team an defensive thei lutuk tia an sawisel changin a ngawi mai mai ngai lo.
Pa cool thei tak ni mah se khelmuala a insum zawh loh langsarberte zinga pakhat chu kum 1997 Bolivia ram Copa America-a Brazil a champion-pui tum kha niin, khami tum khan a team chu champion tura rinkai an ni lo a, mualneitu laka 3-1 hnehna an channa inkhel a tawp rualin a inthunun theihna zawng zawng a kalsan ta emaw tih turin amah tin thuptu television camera hrang hrang hmaah a te chel chul a, a san em avanga boruak duhkhawp hip tur hmu loa ramdang player-te an buai fona La Paz khaw khelmual Hernando Siles Stadium-ah a hmai pawh a sen vek!
Zagallo hi pa puithu tak tia hriat leh sawi thin niin, number 13 hian amahah vanneihna a thlenin a ngai tlat a; 13 chuanna tawh phawt chu a ngaina a ni ber a; a nupui neih ni atan pawh ni 13 thlangin, an fiam fo thinna pawh kum 2013 July ni 13 dar 13:00-ah a retire ang tih a ni thin!
Old Wolf an tih thin Mario Jorge Lobo Zagallo hi kum 1931 August ni 9 khan Brazil ram hmarchhak tuifinriat kam khawpui Maceio-ah piangin, a birthday hmasaber an lawm hmain Rio de Janeiro lamah an chhungkua an pem a, tah chuan football nen an lo inhmelduh ta a ni.
A nih tum hmasaber chu airline pilot a ni a, mahse, a khaw hmuh a fiah tawk loh avangin chu dream chu thlahin ‘accoun-tancy’ lam a zir ta zawk a; a hun awlah an khaw club America tan football a khel thin a, chutih lai chuan a khelhna club chu an khawpuia club lianber a ni nghe nghe.
Brazilian Football Confederation lamin an kawmna an tihchhuahah Zagallo chuan a pain football player ni tura a duh loh thu leh chutiang tura a phal hauh loh thu a sawi a, a chhan a sawi pawh a hun laiin football khela eizawn chu eizawnna (profession) zahawm a ni lo a, vantlangin an hnualsuat a, “…chuvangin, ka hringnuna football lo lut hi tihpalh thilthu liau liau a ni,” a ti.
Zagallo hian left midfielder ni chungin bul tan mah se Pele lo lan hma zawng khan No. 10 shirt a ha thin a, a hnua an kawmnaah, “No. 10 position-a player ropui an tam em avangin Brazil team-a No. 10 shirt hak harzia ka hmu a, left midfield atangin left wing position lamah ka insawn ta a ni,” a ti.
America atanga Flamengo a zawm hnuah Carioca state championship medal pathum awrhin, a career chanve hnuhnung lam chu an khaw club hmelma Botafogo lamah a hmangral a, tah chuan state title dang pahnih a lak belh leh.
A World Cup hmasaber chu kum 1958 Sweden kha niin, match ruk a khel kim a, Garrincha leh chutih laia kum 17 mi Pele-te nen an khelho.
Chumi chungchang chu sawiin, “Kei kha kum 27 mi ka ni a, Pele kha kum 17 a ni thung a, chuvangin, Pele kianga khel ka ni lo a, ka kiangah Pele a khel tiin ka sawi thin,” a ti ve tlat!
Zagallo chanchin ngaihnawm \henkhat
