Eastern Command commanding -in- chief, general officer Lt.Gen. RC Tiwari hnenah chief minister Lalduhoma chuan politics thil ni lo, thildangah Mizo mipui tan Sipai Lammual hmantir se an duh tih a lo hrilh.
Zan riaka Mizoram rawn tlawhtu Eastern Command-a sipai hotu ber hian Thawhlehni tlai khan chief minister hi a office-ah a kawm a. Chief minister hian Assam Rifles-in kum tam tak chhung Mizo mipui tan tha taka hna an lo thawh tawhnaah an lawm hle tih a sawi a. Mipui nunphung nghawng thei engemaw thil tih an neih dawnin state sawrkar nen inrawn tawnin tih thin nise an duh tih a sawi.
“Tunhnaiah Burma nena kan inrina Friendship Bridge chu sipaiten an khar a. Union Home ministry lamin chutiang thil engmah an hre loa, keinin kan lo hre bawk si loa. Khatiang kha awm tawh lo se kan duh a ni,” a ti.
Zokhawsanga AR ram paltlanga loneitute feh kawng thar laih a tul a, tuna an laih thar chu loneitute tan hman tlak a ni meuh loa, a thar laih ngei an duh tih Lalduhoma hian sawiin, a tul a nih chuan state sawrkarin a sir tawn tawn hung mai an inhuam tih a sawi.
Aizawl Sipai Lammual chu Aizawl lailia awm, mipuiin kan mamawh fo a ni, tiin, “Politics thila punkhawm ni lo thil dangah chuan tun aia zalen zawka min hmantir kan duh a ni,” a ti. Ruihhlo dona lamah nasa zawka tan la turin sipai hotu hi a sawm a. Mizoram sawrkarin nasa taka ruihhlo do tumin a inpuahchah mek tih a sawi bawk.
Mizorama awm sipaiten chief minister ngenna, rawtna apiang an ngaipawimawh tur a ni tih Lt. Gen RC Tiwari hian a sawi a. Kawng tinrengah sawrkar an thawhpui tur a ni, tiin, chief minister ngenna an ngaihpawimawh tur thu a hrilh. Lammual chungchangah a naute instruction a lo pek tur thu hrilhin, Zokhawsang ram pawh a rang lama ngaihtuah a nih tur thu a sawi a ni.
Ruihhlo do chungchangah theihtawp an chhuah zel dawn tih sawiin, “Mizote chu hnam inhlawmkhawm tha, hnam thuawih tak in ni a. In tanrual that chuan ruihhlo do kawngah hma insawn em em ang. Kohhran thu in awih thin avangin kohhran pawh hian nasa zawkin hemi lamah hian hma la se a sawt hlein ka ring,” a ti.
Eastern Command commanding -in- chief hi hmarchhaka sipai lal hoin an rawn tawiawm a ni.
Zalen zawka Lammual hman tir turin CM-in AR hotu ngen
