March 12 zan khan Central YMA leh Mizoram Police chuan hnamdang inner line permit nei lo leh felhlel an enfiah a, mi 1187 an man.
ILP felhlel mante hi police station hrang hrangah hlan a ni a. Aizawl khawpui chhung bikah 1019 manin Lunglei, Champhai, Saitual, Serchhip, Khawzawl leh Mamitah mi 168 man an ni.
Bawngkawn Police Station huamchhunga man an tam ber a, 311 a ni. Aizawl Police Station hnuaia man (284) leh Zonuam Outpost huamchhunga man (245) manin an dawt a ni.
Aizawl khawpui huamchin pawn lamah Lunglei P/S hnuaia man an tam ber a, 62 niin Serchhip leh Khawzawl P/S hnuaiah 4 ve ve man an ni a, man tlemna ber a ni.
Central YMA chuan hnamdang ILP neilo dapchhuah kawnga thawkchhuak Branch, Group leh Sub-Headquarters YMA chungah lawmthu a sawi a. Mizoram Police nen thawhhona tha tak neia hma an laknaah lawmthu a sawi bawk.
Mizorama hnamdang hnathawk, ILP neilo thahnem tak awm chu enfiah a, hma lak chhoh zel tul a tih thu Central YMA hian sawiin, ILP pek chhuah dan pawh enthat tul nia a hriat thu a sawi a. Mizorama hmasawnna hna thawktu (construction worker/ company/ contractor) ten an hnuaia hnathawkte permit fel tak ngaihtuah sak turin an ngen tih a sawi a ni.
Zan khat chhungin ILP neilo 1187 man
