Zangnadawmna pek fel theih
loh vangin PWD office kalhsak
PWD Kolasib Division Office chu zangnadawmna pek fel hleihtheih loh kaihhnawihah court thu angin Ningani khan an office kalhsak an nih bakah an bungrua thenkhat laksak an ni.
Thudawn danin, Mizoram PWD chuan kum 2013- 2014 vel khan Kolasib district-a Serkhan leh Bagha inkar kawngpui laih zauh hna thawkin, mimal ram tam tak laksak a ni. Ram laksak neituten zangnadawmna an hmuh tur zat chu sawrkar thuneituten an bithliah fel laiin, chhan hrang hrang avangin zangnadawmna hi pek mai theih a ni lo. Hemi kaihhnawih thubuai hi Kolasib District Court-ah hun engemawchen a inchiah a, 2024 December khan Kolasib Fast Track Court chuan ram neituten zangnadawmna an dawn tur hi PWD-in thla hnih chhunga pe turin order a tichhuak ta a ni.
Zangnadawmna pek tur hi a vaiin Rs. 3,42,25,444.09 a ni a, ram neitu hi mi 62 niin Saihapui leh North Chaltlang khaw mi an ni.
Court order hi PWD chuan an tih hlawhtlin mai loh avangin ram neitute lungawi lo hian Kolasib District Court-ah kumin March khan execution petition an file a, court hian huntiam siamsak leh mah se, PWD-in zangnadawmna hi a la pe chuang loa, chhuanlam mumal a neih bawk loh avangin Kolasib Fast Track Court judge R Vanlalena chuan PWD Kolasib Division bik office building, Kolasib Tumpui Veng ami kalhsakna tur order hi a tichhuak ta a ni.
Office building kalhsak bakah hian PWD office lirthei leh excavator (JCB) bakah khawl lian dang engemawzat chu court hian a hrensak a. A tul ang zelin danin thu neihna a pek angin building leh khawl/ hmanrua hrensak hi auction (lilam) sak theih a ni tih a sawi bawk.
Zangnadawmna pek fel theih loh vangin PWD office kalhsak
