Zanin Australian Open final: Sabalenka vs Keys

Zanin Australian Open final:
Sabalenka vs Keys
Double defending champion Aryna Sabalenka leh 19th seed Madison Keys-te chu zanin Australian Open hmeichhe singles title inchuh tur an ni ta a; Belarusian top seed tan history siamna hun tha a inherchhuak a, tawnhriat ngah tawh American tan major title hmasaber sualchhuahna hun remchang vawihnih a tawnbuakna a ni thung ang.
Kum 29 mi Keys hian kum 2017 khan US Open title hnai taka thlirliamin final-ah a chipui Sloane Stephens a ngam lo a; tun hi major final a thlen vawihnihna leh Melbourne Park-a championship match a khelh vawikhatna tur a ni.
Belarusian top seed Sabalenka-i’n Australian Open-a mellung thar a phun theih dan tur chungchang tarlan a ni fo tawh a; zanin hian a chak leh chuan Martina Hingis (1997-99) hnu lama Australian Open title vawithum la zawn leh thei hmasaber a ni dawn a, a career-a Grand Slam title pali a lak tlinna a ni nghal ang.
Ningani semi-final match pakhat zawkah Sabalenka hian tennis khawvela a thian kawmngeih berte zinga pakhat Paula Badosa lakah bul a tan tang at zo bik lo a, unforced error a nei zeng zung a, opening set-ah 2-0-in a hnufual hman hial!
Rei erawh a talbuai duh ta chuang lo a, a forehand pui takin a nih dan tur ang takin hna a han thawk chho a, a tawpah 6-4, 6-2 hnehna changin Spaniard 11th seed major semi-final hmasaber chu a dangchat.
Hnehna a chan zawhah Sabalenka chuan a inchhuan larh thu leh a team-te a chhuanzia sawi chungin history ziak tura a hming a chhawpchhuah tak chu a lo mangphan thin a nih thu leh final-a hnehna chang ngei turin amaha awm zawng zawng khek nei loa a sawrchhuah tur thu a tarlang tel.
Ningani zan inkhelah khan Badosa pawhin quarter-final lama rinkai zawk Coco Gauff a hnawhchhuah kawnga a fighting spirit pui tak hmang bawk khan han nawr leh tum ngial mah se Melbourne Park final hnuhnung pahniha tu dan rual loh Sabalenka ‘pressure’ zet chu a do zo bik lo a ni ber!
World number one Sabalenka hian khelmual pawn lama a thiantha ber a danbeh boruak sawiin, “Ni hnih khat chu min ngei ngei dawn a, mahse, kan inthian zui leh thuai ang a, kan bazar dun leh dawn tih ka tiam che u a, a duh apiang ka leisak leh tho ang,” a ti!
Top seed Sabalenka hian a thian tha Badosa hi ‘ka thlarauin a zawm ta’ tih hla ang mai khan a ‘soulmate’ a nih thu a lo sawichhuak hial tawh a, mahse, khelmual chhungah erawh an inthianthatna dahthat hmak a tum thu sawiin, chuti ang ngei chuan a khawsa a, a hnua a sawi ang hian, an inngei rei lo turah ngai ang!
Australian Open women’s semi-final dangah Madison Keys chuan chak tura mi rin zawk second seed Iga Swiatek lakah 5-7, 6-1, 7-6(8) hnehna changin a vawikhatna’n Australian Open final a thleng a; world number two laka chak kha a career-a a hnehna sualchhuah hraw ber niin, zanin hian a major title hmasaber tur beiseiin Sabalenka lakah fiahna hautak zawk a hmachhawn zui leh dawn a ni.
Kum 29-a upa Keys hian Australian Open inbuatsaihna warm-up tournament pakhat Adelaide title hlawhchhuakin, Grand Slam-a vawinga tehreng champion tawh Swiatek laka hnehna a chan leh rualin Rod Laver Arena mipui lawm a hlawh hle a; match 11 a chak zawnna a ni nghal.
Swiatek hi final luh a harsat thinna Melbourne-ah hian kumin chu a tawrhthlelhawm hle a, semi-final a thlen hmaa match nga a khelhah game 14 chiah hlohin, Open era-a player 128 telna draw-ah last four luhna kawnga amah aia game hloh tlem chu player pathum chiah an awm!
Chuti khawp chuan kumin hian a la champion ve lohna Australian Open-ah rawn beiseiawm chho teh mah se Rod Laver Arena inkhelah major title sualchhuah em la nei lo chunga tawnhriat ngah ve tawh tak Keys a khawng char ve tlat a, Pole hian a vawithumnaah pawh darkar hnih leh minute 35 chhungin Australian Open semi-final a la paltlang zo leh ta chuang lo a ni!
Zanina final-a a hmachhawn tur Sabalenka chungchang sawiin Keys chuan, “Vaw nat zet leh point hmu tura rei ngial inralsai ngai thei lo zet hmachhawn dawn mah ila he chona hian min tiphur tawh takzet a ni,” a ti.
Australian Open hnuhnung pahnih leh nikum US Open-a champion bawk Sabalenka hi Melbourne Park-a match 20 chhung tehreng chak zawn lai a ni a, American Keys tan pawh Belarusian kal tluang lai chelhdin hi a khirh ve fat ngei ang le!