Real Madrid manager Carlo Ancelotti chuan zanin Uefa Champions League Group C match pakhat zawka Napoli an mikhual hunah tun season goal-a an innghahna lian ni chho ta star English midfielder Jude Bellingham a chhawr thei dawn em tih he thu buatsaih lai thleng hian a la sawichiang thei lo.
Tunthla tir lama Rayo Vallecano an hmachhawn tum khan Bellingham hian a dar a tina a, Los Blancos tan pawh game khelh loh zawn a nei hman a, England tan pawh Euro qualifiers game hnuhnung pahnihah a inlan thei lo.
Pathianni zan La Liga match-a Cadiz an hneh tum khan minute 73-ah Real goal thumna thunin, a hnu lawkah an thlak zui a; inkhelh banah boss Ancelotti chuan amah bawrtu reporter rual hnenah Englishman dinhmun a that thu sawi chungin harsatna chhete erawh a la nei tih a sawi a, a intihnat belhchhah lohna’na lachhuak a nih thu leh Nilaini zan Champions League a khel dawn em tih a la sawichian theih loh thu a tarlang tel.
Kum 20 mi Bellingham hian Real tan inelna hrang hranga match 15 a khelh tawhah goal 14 thun tling tawhin, match heti zata Bernabeu club tana goal khung hnember record a siam hlimhlawt nghe nghe a, hliamin a tlakbuak lo a nih chuan Real Madrid tana goal khungtu ropui ni thei tura beisei a nih laiin dar hliamin a goal khung mar lai a tibuai a, Pathianni zanah goal nen kirleh tawh mah se zanin Europe game-ah a lut ngei dawn em tih sawi theih a la ni lo.
Spain leilung a rah hnuah Bellingham hian midfielder ni chungin goal a thun mawlh mawlh a, thla hmasa maia Paris khawpuia Ballon d’Or award ceremony-ah khan khawvela U-21 player tha ber chawi-mawina Kopa Trophy 2023 hlan a ni nghe nghe.
Zanina Bellingham dinhmun tur la chiang lo
