Mizo Idol Season 8 chu zaninah a hmawr an bawk dawn ta a, Top 3 finalist- Vanlalneihpuii, Zomuansanga leh Emanuel Lalremruata te intihsiak lehin, result puan nghal a ni ang. Idol finalist te hian intihsiak tum hnih an nei dawn a, a zan khatnaah hla pahnih theuh sa tawhin, zanin hla khat theuh an nei leh ang a, zan hniha hla pathum an sak chu endik nan hman vek tur a ni.
Nizan hmasa Top 3 finalist intihsiak zan khatnaah hian Neihpui’n ‘Chu Tlangah Chuan,’ tih leh ‘Malsawmna Bul’ tih hla te sain, hla muang leh kal deuh delh delh bakah hla tang deuh et awtah pawh a theihna a danglam chuang lo tih lantir lehin, a aw chak leh zaithiam zia a rawn phochhuak leh ta.
Emanuel-a’n ‘Ka Hringnun Diary’ leh ‘Min Liamsan’ tih hla rawn sain, hla sak tur a thlang sual lo hle a, a aw zûna uai tawh laklawh te chu an tliak hnâwp dawn a nih hi tih theih tur khawpin an rawn chetha leh a, fans lamin Idol title an mitthla thei tawh hial mai thei a ni.
Zomuana lah pressure a sang telh telh a a chetha tawlh tawlh emaw tih mai turin ‘Nang Nen’ tih leh ‘Nang Ngaih A Zual’ tih hla nen Idol final zan khatna stage a rawn luhlum tha viau a, round hmasa lama mipui kut thlakna, social media views atanga stage sang zawk a lo inhlangkai ang ngawt kha a ni tawh lo a, Idol intihsiak chhunga a hmasawnna chu a zuanin a zuang tak meuh tih hai rual a ni lo.
Mizo Idol final zan khatna performance-ah che chhe fal tih tur an awm lo a, zanin performance hi engkim la tidanglam thei a ni a, an pathum zingah ‘Idol’ tur han tih theih bik an la awm lo a, zanin boruak a hot khawp ang le!
Zaninah Mizo Idol Season 8 Grand Finale
