Zalenna sualtute’n March ni 1, 1966-ah zalenna
an puang a, March ni 5-ah India sipaite’n jet fighter leh bomb hmangin Aizawl an bei; Aizawl khawpui a ruak a, in engemaw zat a kang.
Hemi tuma Aizawl beitu jet fighter hi toofani leh hunter a ni a, jet fighter bomber tih deuh kher niin, hunter phei hi chu a hun laia India jet fighter chhuan ber a ni.
A hre phate sawi danin, March ni 5, Inrinni chawhma lam, tukthuan ei kham velah jet fighter pali an rawn thlawk a, bomb leh an hmanraw dangin Aizawl khawpui an bei ta a ni. A tukah jet fighter hian Aizawl an bei leh bawk. Mipui an tlanchhia a, hun engemaw chen chu Aizawl khawpui hi a ruak deuh huai!
Jet fighter hmanga Zoram beih a nih laia India ram hruaitute chuan he thil hi an pha a, prime minister Indira Gandhi pawhin Mizoramah bomb ni lovin ‘ration’ an thlak niin a sawi. Khasi MP Prof Swell chuan Parliament-ah India-in Aizawl beihnana nana an hman ralthuam keh them lekchhuakin, “Hei hi maw in ration thlak chu, chhum hmin a va’n har awm ve?” tiin prime minister a chhuahchhal a ni. Khasi MLA pahnih – Stanley DD Nichols Roy leh Hoover H Hynniewta te’n Assam Assembly House-ah jet fighter hmanga Mizoram beih a nih avanga sorkar an dem thu an auchhuahpui bawk.
Thlawhna hmanga Aizawl beih a nih laiin mipui an tlanchhe nasa a, Zosap missionary Pu Robert-a hovin tlangval tlawmngaite’n ruangte an senghawi a, hun ralti tak hnuaiah Aizawl hi an thianfai a ni.
Aizawl bakah hian Mizoram khaw dangte pawh a hnu-ah jet fighter hmang hian beih a ni a, hriat theih chinah Hnahlan, Tlabung, Sangau, Khawzawl, Pukpui, S Mualthuam, Bunghmun leh Hmuntlang te pawh jet fighter hmanga beih a ni.
Zawlkhawpui senmei chan ni – March ni 5, 1966
