Zawlnei hna leh zawl thupuan chungchang hi Kohhran chhungah pawh kan sawi zin pawl tak leh kan zir nasat tak pakhat niin a hriat. Chutih laiin mipuiah hi chuan kan fiah hleithei hlawm lo niin a lang. Sawi hona hmunah hian sawi ngai bawk hi sawi nawn a ngai leh thin. Mite thinlung nemna lai leh hlauhna nena a inzawm miau avang hian Pathian lam thil hi mi bumna hmanrua atana hman theih tak a ni a. Chu chuan hetiang mi hi a ko chhuak leh thin a ni ang. He khawvelah hian inla zawlnei tlat leh Pathianin a hriattir bik emaw intia dinhmun sang deuh bika indahte emaw awm theih a ni. Fimkhur a ngaihzia hi chiang ila a duh awm ngawih ngawih thin.
New Apostolic Reformation Movement
‘New’ han ti lemah chuti taka thil thar em em chu he ‘New Apostolic Reformation (NAR) Movement’ an tih hi a ni lem lo va. Kum 1996 daih tawh khan California-a Fuller Theological Seminary Professor C. Peter Wagner chuan intawhkhawmna pakhatah a sawi tan a. Tunlai khawvelah Thuthlung Thara Apostol-te rawngbawlna ang chi rawngbawlna kha a lo thleng leh dawn tiin a sawi tan a ni awm e. Chutiang Apostol thar te chu thilmak tih theihna, natna chunga thuneihna leh thil sawi lawk theihna mak tak nei angin a sawi. A nihna takah chuan hetiang mi nia inngai hi an lo awm fer fur tawh zawk a, Peter Wagnera hian an hming phuahin a puang thar a ni mai zawk awm e. Chu NAR Movement chu Kohhran pawl bik hnuaiah ni lovin hetiang Apostol-te kaihhruaina hnuaia kal tur a ni, a ti bawk a ni awm e.
American ho sukthlek khuan khawvel a chiah hneh viau zel a. Chu chu Kristiannaah pawh hian a dik chin a awm ve tlat. Social media darh zau tawh hnuah phei hi chuan a dik thui lehzual awm e. Chuvangin keini ho zingah pawh hian hetiang lo tuipui pha deuh, lo ‘apostol’ leh ‘zawlnei’ chak ve pawl leh ngaisanna danglam taka lo thlir pawl awm ve theih a ni. Chu bakah lo ngai ‘thlarau’ danglam riau te pawh awm fo a ni bawk a. Kan hriat tura tha erawh chu ngaihtuahna fel tak hman thiam a pawimawh tih hi a ni. Heng mite hi Pentecostal-Charismatic group mi leh sa an ni thin tih te, mimal dawn ang anga kal an nih mai dan te, tunlai ‘apostol’ leh ‘zawlnei’ anga an inngaih mai dan te, thilmak leh zawl thupuan an leklam dan te hi hriat tel a tha. Heng thilah hian zirtirna dik lo leh nunphung dik lo a inzep hma hle tih hre tel ila.
Tunlai zawlnei (?) lar ber a che chhia
Zawlnei nih hi a nuam riau ni tur a ni, inti-zawlnei hi kan tam sawt riau. Amaherawhchu, an che chhe ve hle thin hi a nuihzatthlak zawk. A lar ber pawl Shawn Boltz an tih phei hi chu a ti fuh lo nasa ve thin a. Covid 19 pandemic lai khan hripui leng kha a reh mai tur thu kha a sawi lawk vei rawk a, a mualpho nasa hle a ni. Hollywood-ah harhna a thleng dawn a, celeb tam takin Isua an hmuh tur thu te a sawi a, a thleng ta lem lo a ni bawk awm e. Hetiangte hi chu miin an ngaidam thei mai zel a, mahse hman deuh lawka thil thleng erawh kha chu an ngaidam thei ta ngang lo a ni ang. Ani pawh rawngbawlna atangin a inhnuk dawk hmak mai. ‘Zawlnei’ taka mite chanchin hre thei riau anga a lo awm te kha social media-ah a lo zawn lawk thin vang a ni tih te, mipat-hmeichhiatna kawngah pawrhcheh angreng taka a lo khawsak thinzia te an hailan sak ta si a (‘The skeletons in Bethel’s closet are now going to speak’ – Mike Winger, https://www.youtube.com/watch?v=GH05S53QlY0). A lo che ‘Pathian zawlnei’ lo vet vet khawp mai.
Mike Winger-an darkar 6 dawn lai daih Youtube post -a a hai lan hnu hian ‘zawlnei’ inti thinho khawvel leh an rawngbawlna a buai ta rap rap mai a ni awm e. Mi tluangtlam zawkte thlarau nun, rilru thianghlim tak nena anmahnia rinna an lo nghah dan zawng zawngte anmahni hmasial nana an lo tihbawrhban dan, Pathian hlauhna tel miah lo va Pathian hminga thil an lo tih dan te chu phawrh chhuahin a awm ta a ni si a. Hun rei tak rawng a lo bawlpui tawh NAR Pastor lar Bill Johnson, kohhran lian tak Bethel Church, California enkawltuin a lo zeppui nia an hriat avang te hian mite a tihnual nasa. Anni pawh hian ngaihdam dilna thu an chhuah hial lo thei lo va. Chutih lai chuan Bill Johnsona hian, “Thleng dik chiah lo fo mah se zawl thu puan te hi chu a thatna a tam ve tho alawm, miten chakna an lo hmuh phah fo,” te a la ti ta deuh deuh. Tunlaia ‘zawlnei’ anga inngai lian bik riau leh Pathian hman bik ang riaua inhriate hian Pathian dan thianghlim hi palzut permission nei bik deuh hian an inhre thin emaw ni dawn ni?
Bethel Church-a thil thleng thenkhat
Kan sawi mek Bill Johnson-a, Bethel Church Pastor pawh hi chanchin ngah ve tak chu a ni reng reng a. A kaihhruaina hnuaiah hian an kohhran member an pung nasa chu a nia. |awnghriatloh, damna, zawl thupuan, tih angreng hi chu a tam a ni awm e. |um khat phei chu thawktu pakhat fanu thi tawh chu tawngtai dam tumin kar khat lai an bei a. An hlawhtling ta lem lo a niang! Ringtu nunah thilmak leh danglam tak tak hi thleng reng turah an ngaih hmiah a ni ber e. Bethel School of Supernatural Ministry dinin zirlai an la lut ve ruih ruih a. He schoolah hian thilmak nena rawng bawl dan an inzirtir a ni ber awm e. Tam tak chuan an zir chhuak ve bawk, an ti. Thilmak tih te hi inzirtir chawp theih emaw ni dawn tehreng ni?
An sawi mak ve angreng tak pakhat chu Pathian mi hman ropui tak tak tun hmaa thi tawhte thlanah hian an thlarau lo chan tawh chan ve tumin eng emaw chen an mu thin, an ti a. He puhna erawh hi chu an kohhran zirtirna a nih lem loh thu an sawi an ti. An zinga mi thenkhat hetianga khawsa duh hi an awm ni ngei tur a ni. Tun hnu deuhvah hian Bill Johnson hian New Apostolic Reformation mi leh sa a nih loh thu a sawi an ti bawk. Amaherawhchu, a rawngbawl dan leh thil tih tawh danah a meizang hlaptu ber nia sawi pakhat a ni si. Bethel Church lar chhan tak pakhat chu an music hi a ni a. Fakna hla lar tak tak an tichhuak awm e. Chung zingah chuan ‘Goodness of God’ tih hi kan hre theuh hlawm mai thei a ni.
A lan ang ngawt an ni lem lo thin hi
Rilru tha tak nena ral hla tak atanga lo thlir hi chuan hmuh mam thlup mai hi tu pawhin kan awlsam theuh mai. A hmuna han bihchian chet chet erawh chuan chuti taka buaipui tlak em em chu an lo ni bik lo fo. New Apostolic Reformation Movement ho phei hi chu Kohhran kalphung kan hriat pangngai nen hian dang tak an ni. Chuvang chuan an zirtirna a him tawk lo kan ti thei ang. Thu leh nihphung lo inhlan chhawn tawh lam aiin mimal dawn san lam an ngai pawimawh a ang a, rawngbawltu (apostle/prophet) thuneihna a sang ber a ni mai. Nunphung pangngai piah lam thilmak an leklam nasa hle mai hi an danglamna leh chak lohna pakhat a ni bawk mai thei e. Keini erawh chuan thilmak leh mak loh hi tehfung berah hmang lo phawt mai ila a fihlim thlak awm e.
ZAWLNEI PAWL PUI: Rev Dr Ramengliana
