Zelenskiy-a’n ral hmatawnga a sipaite a tlawh

Zelenskiy-a’n ral hmatawnga a sipaite a tlawh
President Volodymyr Zelenskiy-a chuan Ukraine chhimchhak ral hmatawnga a sipai awmte a tlawh a, heng lai hmun hi Russia-in tun hnaiah a bei nasa a, indona pawh a nasa hle.
A ram chhunga ei rukna thubuaiin a sorkar an tihbuai mek laiin Zelenskiy-a hian Orikhiv khaw bul vel din hmun chu a khirh hle tih a sawi a, Russian sipaite lo dana Zaporizhzhia khawpui an humna pawimawh a ni tih a sawi.
“Zaporizhzhia hi khawpui pawimawh, kan hmelmaten an duh a ni a. Keini pawhin hum kan tum a ni,” tiin Ningania a tlawhnaah hian sipaite nen ral rama an intihchak lehzual theih dan tur an sawi.
Kum 2022-a Russia-in a rûn atangin helai hmunah hian khawi ve ve mahin mah an sawn lo rei hle a; mahse, Ukraine ram 19% lai thunun tawh, Moscow sipaite hian kum 2023 tawp lam atang khan nasa zawka beiin hma an sawn hret hret.
Russian sipaiten khawchhak lama Pokrovsk khawpui laa hmarchhaka Kupiansk an tukdawl mek laiin chhimchhak lama hma an sawn dan pawh Ukraine leh a thawhpuite tan ngaihven ngai tak a ni mek.
Ukrainian sipai commander Oleksandr Syrskyi-a chuan kar tir lamah khan Zaporizhzhia region hmun thenkhatah an dinhmun chu a khirh hle tih a lo sawi tawh.
Poland-a Rochan military-a an director, Konrad Muzyka-a chuan hmarchhaka Huliapole leh Velyka Novosilka-ah Russia hi thla hnih vel liam ta atangin hma an sawn tan niin a sawi a. “Hei hi an tum ber a ni lo va; mahse, Ukraine hi sipai an indaih tawk loh avangin Russian-te hian hma an sawn nasat phah,” tiin a sawi.
Velyka Novosilka khawthlang lam an luh chuan Huliapole chu hmar lam atangin awlsam takin an lut thei dawn niin a sawi a. “Hei hi Ukraine hi an hnawh khah vat loh chuan Russian sipaite hian khawthlang lam nawr zelin Zaporizhzhia an hnaih zel ang,” a ti.
President pisaa sipai hotu, Pavlo Palisa-a pawhin Russian sipaite hian an chak lohna lai an dap a, chhum zing nasa chu hmang tangkaiin hma an sawn nasat phah niin a sawi ve bawk.
Zelenskiy-a bunker-a sipaite a talwhnaah hian commander-te nen inkawmin an sipaite tihchak dan tur, thawktu leh hmanraw pek belh dan tur an sawiho.
Ukraine hian tun hnaiah drone hmangin Russia an bei nasa a, an tuialhthei hmunte an bei nasa a, hei hi Moscow-in sum a lak luhna tur tihtawp nana an tih a ni.
Nilaini zanah pawh khan Crimea leh Zaporizhzhia region-a tuialhthei dahna leh sipai hmun dang an kap fuh niin an insawi a. A kah nan hian cruise missile an neih thar, kilometre sang chuang kap phak, Flamingo pawh an hmang tih an sawi.