A palai, Steve Witkoff-a’n Ukraine-a indo tihtawhna tura inremna peih fel hnaih a nih thu a sawi hnu lawkah US President Donald Trump-a chuan Ukrainian hruaitu, Volodymyr Zelensky-a nen ‘hlawk takin an inbia’ tih a sawi.
Hruaitu pahnihte hi Davos, Switzerland-ah World Economic Forum-ah Ningani khan darkar khat chuang inbiain a hnuah Trump-a hian ‘kan inkawmna chu a hlawk viau’ tiin a sawi.
Witkoff-a hian Ningani zan khan Russian President Vladimir Putin-a pawh Kremlin-ah a hmu zui a, Trump-a chuan ‘tute pawhin indo tihtawp an duh’ tih thuthar lakhawmtute hnenah a sawi.
“Kan mutan pakhat kan sawi fel niin ka hria a, thil dang sawi ngai a la awm a, chin fel theih a ni,” tiin Moscow pana Trump-a makpa, Jared Kushner-a nen an chhuah hma lawkin Witkoff-a chuan a sawi.
An mutan hi eng nge tih a sawi chiang lo va; mahse, Ukraine-a industry awm tamna lai, Donbas hma lam hun tur leh sipai dah lo leh Kyiv him nana free economic zone siam chungchang a nih rin a ni.
“Lehlam lehlam hian tihfel an duh a nih phawt chuan kan tifel em em ang,” tiin Witkoff-a chuan a sawi.
Ukrainian president hian Ningani zanah Davos hi a chhuahsan a. Russian-ten Kyiv-a power hmunpui an beih nasat avanga thlasik vanglaia an khawpui hmun tam zawka intihlumna, tui leh power khaihlak buaipuiin a zin hun a sawn tlat a. Apartment block sang telin intihlumna an la nei lo zel.
Zelensky-a hian thla hmasaa Trump-a nen Miami-a an inbiak zawh khan US-in indo tihtawp nana rawtna point 20 a siam chu 90% peih a nih tawh thu leh Ukraine khawchhak lama Donbas chungchangah Russia nen an ngaihdan a inan loh thu a sawi.
Zelensky-a hian Russia-in a tih ve theih dan chuan Donetsk region 25%-ah, an la awp chin km 40 thlenga thui chu economic zone atana siam a inhuam thu a sawi a. Russian sipaite hian nikum khan khawchhak lamah hma an sawn hret hret a ni.
Thla hmasa inbiak laia an inrem lohna dang chu Ukraine-a Zaporizhzhia nuclear plant enkawltu chungchang niin plant hi Russia-in March, 2022-a a lo chhuhsak tawh kha a ni.
Kremlin thupuangtu, Dmitry Peskov-a chuan Ningani khan American palaite nen ‘Ukrainian harsatna leh a ken tel dangte’ an sawiho dawn tih a sawi.
Zelensky-a nen hlawk takin kan inbia – Trump
