Zelensky-a’n Russia hlauhawmna sawi

“Ramhuai rin ngam a ni lo” tiin Ukrainian President Volodymyr Zelensky chuan UN General Assembly-ah sawiin, an ram Russia-in a run chu titawp turin khawvel chu a ngen zui bawk.
New York khawpuia thusawina a neihah Zelensky chuan nuclear-armed Moscow chu ‘indona tawp tura khawvel a nawr mekah’ tihtawp a ngai tiin a sawi.
Russia chuan food atanga energy thlengin ralthuamah a hmang vek a ni tiin a sawi bawk.
Zelensky chuan Russia chu khawvel tana hlauhawm tia sawiin khawvelin harsatna a tawh mek climate change angte chu Moscow nawr tawm a nih hma loh chuan kalpui tak tak theih a ni dawn lo a ti bawk.
“Indona tawp thleng turin Russia-in hma a la mek zel a, Ukraine chuan Russian huangtauna chhu chata eng ram mahin ram dang an run ngawt a rem tawh ngai loh chuan hma a la mek a ni” tiin Zelesnky chuan khawvel hruaitu lawk kalkhawmte hmaah chuan a sawi bawk.
Russia chuan ‘nuclear weapons nei turin dikna a nei lo’ a ti bawk a. “Weaponisation chu khuahkhirh ngai a ni a, war crime te pawh hrem a, ram danga tlanchhiate laklet a, an rama an luah leh remtih tur a ni” tia sawiin, “Chutiang tur chuan kan inlungrual a ngai a, kan tithei bawk” tiin Zelensky chuan a sawi bawk.
Moscow chuan Ukrainian naupangte ru bovin ‘genocide’ a kalpui mek a ni a ti bawk a.
March thla khan International Criminal Court (ICC) chuan Russian President Vladimir Putin chu dan kalha Ukrainian naupangte Russia rama a thawnluh avangin man theihna ‘arrest warrant’ a tichhuak nghe nghe a ni.
Moscow chuan Ukraine puhna erawh hnawl thungin, mahse international experts leh organisation-te chuan Ukrane-ah Russia chuan war crime a kalpui ngei tih chianga an ngaih thu an sawi thung.
Ukrainian president chuan Indopui II-na thlen hnua Europe-a indona turu ber thleng mekah fimkhur taka chinfel a ngaih thu a sawi a. Ukraine indona chuan khawvel mi tinte a nghawng vek dawn a ni a ti bawk.
Russia thiltum ber chu Ukraine chu ‘in laka ralthuam, rules based internation order kalha siam a ni’ tiin a sawi bawk a. Peace formula siam mekte chu Ukraine tan a ni lo va, khawvel pum tan zawk a ni tiin a sawi bawk.
Zelesnky thusawi hi ram dang, a bik takin ‘Global South’ intite Brazil leh India-te tun thlenga Ukraine indonaa tan lam emaw nei duh hauh lova la awm mekte a sawina nia ngaih a ni bawk.