Zelensky Europe zin hlawhtling hle

Ukrainian President Volodymyr Zelensky chuan European union ram pathum tlawha a zinkual hnuah military aid $1 billion a hawn a. Mahse, President Vladimir Putin chuan Western-supplied weapons ten Russia leilung a deng a nih chuan indona hlauhawm zawk kawngzawh tihna a ni ang tiin a vau lawk thung.
Ukraine hi Belgium chuan sum hmanga pui dawnin kum li chhunga Ukraine in F-16 fighter jet 30 a leina tur sum a pe dawn a ni.
“Kan tum ber chu kumin chhung ngeia indona tualzawla F-16 hman theih a ni a, tichuan kan dinhmun kan sawhnghet thei dawn a ni” tiin Zelensky chuan a sawi.
A hnuah Portugal tlawhin chutah chuan Ukraine thlawptute chu Russia bumnaah tawlhthlu lo tura ngenin ‘Indona avangin kan chau lo’ tiin a sawi.
February 2022 hnuah tun hnaiah Ukraine summer thlen dawn hnaih tawhah Kremlin chuan nasa takin Ukraine khawchhak leh hmarchhak lam a bei nasa hle a.
Ukraine thlawptu Khawthlang ram tena ralthuama an puihna a thleng muang bawk si, a bik takin US military aid tihkhawtlai chuan Russia army leh air force lian zawk lakah Ukraine chu a che thei der lo a ni.
European ram tena Ukraine-ah a sipaite kaihruai tura sipai tirh luh chungchang an sawihona leh Russian asset te Ukraine hnena pek mai tur a ni em tia an sawiho chuan Moscow a tithinur takzet bawk a.
Putin chuan Khawthlang ramte chu indona an kalpuiah inhnamhnawih thuk lo tura vauin nuclear indona a thlen thei tiin a sawi a.
Khawthlang ramte ral thuam long-range weapon Ukraine hnena pek a niha Russian territory kah a nih chuan chu chuan indona hlauhawm tak a thlen thei tiin Putin chuan May 28 khan Uzbekistan a tlawhnaah a sawi.
Chung ralthuam hlauhawm te chu hman a nih dawn chuan NATO military personnel te an inhnamhnawih ngei a ngai dawn a ni, tiin Putin chuan sawiin NATO alliance te chu a nghawng tur hisap turin a vau bawk.
“NATO member ram a bik takin Europe a awm te chuan an thutlukna siamah an fimkhur a ngai a ni. A bik takin ram te zawk leh mipui tamna ni bawk si te chu an fimkhur zual a ngai” tiin Putin chuan a vau zui.
Netherlands chuan Ukraine hnenah Patriotic air defense system pek a tiam a, he ralthuam hi Zelensky an Russia in Ukraine power grid leh civilian area a beihna dal theitu a tih a ni bawk.
Netherlands thutlukna siamah NATO chief Jens Stoltenberg chuan lawmawm a tih thu sawiin mahse nasa zawka Ukraine chu puih a ngaia ti a. “Hmasawnna kan hmu a, mahse, hmasawnna nasa zawk leh air defense system tam zawk te chu Ukraine-in a mamawh a ni” tiin Stoltenberg chuan a sawi.
Ukraine a let leh hmain Zelensky chuan Portugal tlawh bawkin ram pahnih thawhdunna tur thuthlung an ziak bawk a. Portugal chu Europe-ah pawh ram rethei ber pawl niin sipai pawh a nei tlem a. Mahse, Portuguese Prime Minister Luis Montenegro chuan Portugal chuan Kyiv hnenah military leh financial aid 126 million a pek tur thu a sawi.
May 27 khan Zelensky chuan Spain nen security agreement ziak bawkin chumi hmang chuan kum 2024 chhungin Spain in Ukraine hnenah military aid $ 1.1 billion a pe ang a, kum 2027 thlengin kum tin pein 5 billion euros a pe tling dawn a ni.
Hetianga Europe ram tena Ukraine an puih a ngaihna chhan hi Ukraine-in ram 27 awmna EU bloc a tel a tumna chu Hungary-in a dodal tlat avanga a tel theih loh vang a ni.
EU-in Ukraine hnena tanpuina 6.5 billion a pek tum pawh Hungarian government Prime Minister Viktor Orban, Russia thlawp bur in a dodal tlat avangin pek a ni thei lo, a chhan chu EU member pakhat pawhin a remtih loh chuan EU angin pek theih a ni lo.
“Sum kan nei a, theihna kan nei bawk a, mahse Ukraine hnenah tanpuina kan pe thei tlat lo hi chu a pawi a ni” tiin EU foreign policy chief Josep Borrell chuan a sawi.
Russia-in northeastern Kharkiv region a beih nasat leh hnuah Zelensky chuan Ukraine chuan rang takin US siam Patriot air defence system pasarih tal a mamawh belh tiin a sawi bawk a.
Dutch Defence Minister Kajsa Ollongren chuan EU a a thawhpuite a biak hnuah Patriot system chu hun rei lo te chhungin an siam tur thu a sawi a. Netherlands-in Patriot system core component a nei vek a, EU ram ten a part pawimawh leh munition te an thawh ve bawk ang, a ti.