Zirna lama zirbingna chu Mizoram Education Reforms Commission-in a taka hmang ngam tura an intintuah a ngai tih School Education minister Dr Vanlalthlana chuan a sawi.
Secondary school zirlaite harsatna zirbingna hmanga report (Identification of Learning Problems of Secondary School Students in Mizoram) chu Thawhlehni khan tlangzarh a ni a. Samagra Shiksha leh Institute of Advanced Studies in Education (IASE) ten thawhdunna thuthlung an ziak nghal bawk.
Hmanpuitu School Education minister hian zirna lama kan ram mamawh em em zirbingna (research) a pawimawh tih sawiin, tuna secondary school zirlaite harsatna zirbingna hmanga report chu Mizoram Education Reforms Commission-in implement ngam tura an intintuah a ngai tih a sawi.
Zirchianna atanga a lan danin, school zirtirtu semrual loh avanga subject zirtirtu indaih lohna awm thin chu pawi tiin, a theih chin chinah school leh zirtirtu data enchian a, semrual (rationalise) an tum tih a sawi a. Khawtlang mipui leh nu leh pate pawhin an khaw school dinhmun chauh ngaihtuah loa, midang nena inkhaikhin thin turin a chah.
“Kan sawrkar chhung hian data felfai tak hnutchhiah kan tum a, kan ram zirna-in kan thatpuina tur a nih dawn phawt chuan beidawng loa hma lak zel kan tum,” Dr Vanlalthlana hian a ti a. National Achievement Survey (NAS) ah an performance a that theih loh chhan chu zirbing a, theihtawpa hmalak dan ruahman kawngah ngaihtuahna seng turin a chah bawk.
Zirbingnaah hian district 11-a zirna in 69-a zirlai 2983 chu questionnaire hmanga zawhna chhantir an ni.
Zirchianna report a taka hmang ngam turin kan intintuah a ngai – Dr Vanlalthlana
