School Education department huaihawtin Thawhlehni khan rampum huapa lawmman late lawmpuina leh Smart City hmalaknaa primary school 121 hnena computer set semna buatsaih a ni.
Hmanpuitu School Education minister Dr Vanlalthlana chuan Red Ribbon National Quiz Competition-a lawmman latu PES Republic naupangte leh zirtirtute, National School Band Competition-a pathumna dawngtu Govt. Mizo High School te chu a lawmpui tih a sawi a. Smart City hmalaknaa primary school 121-in computer set an dawng chu a lawm thu a sawi bawk.
“Mi hlawhtlingte hi an hlawhtlin hnuah nawm hmel deuhin kan hmu a, an thawhrimna kan hmuh hmaih thin. Phur thuta mi hlawhtling nih tum ngawt chi a ni loa, a kalkawng – tumruhna leh thawhrim peihna hi a pawimawh lai a ni,” a ti. Zirlaite chu an nun kawng zawh mekah risk la ngam tur leh huaisen taka kal ngam turin a fuih.
Kumin January 12-a Jaipur Rajasthan-a Red Ribbon National Quiz Competition-a tel Presbyterian English School Republic Veng zirlai pahnih – Zonunsangi leh Janet Malsawmpuii te chu pakhatna an ni a. Hemi thleng tur hian district, state leh regional level-ah pakhat an ni vek.
Kumin January 22 khan New Delhi-ah National School Band Competition neih a ni a. Mizoram atanga tel Govt Mizo High School Pipe Band Boys chu pathumna an ni. Hemi hma hian Bhubaneswar-a zonal band competition-ah pakhatna an lo ni tawh.
Zirlai lawmman late lawmpui
