Zirlai tlanchhiain first division-ah pass

Tlangkhua a awm a, Chin state-ah, Myanmar-ah; Myanmar khaw dang ang bawkin an ralti a, hmun him lamah an tlanchhia. An zinga pakhat chuan tun hnaia result chhuak HSSLC (Arts) kha first division-ah a pass.
Chu zirlai chu Ngun |ha Hnem-i a ni a, Khawbung Higher secondary School zirlai a ni. Khawbung hi 2021 June ni 12-ah an lut a, 2024-ah HSLC a lo pass tawh. Tunah pawl 12 a pass leh ta.
“A tirah chuan ka huphurh a, kan zir a inang lo sia. Hriat ngai loh khua a ni bawk sia, zak chung chungin, inthlahrung deuhvin sikul kha ka kal a. Kan zirtirtute leh zirlaite an lo fel a, ka tlangnel har lo,” tiin Khawbunga an tlanchhiat hnua sikul a luh tan lai chanchin a sawi.
An khuaah pawl 5 thleng a zir a, Halkha-ah a zir zawm leh. Chumi hnuah chuan zirlai thar a zir ta thut a, Khawbungah KM Middle School-a pawl 8 a zawh hnuah Govt Khawbung High School atangin HSLC a zo a, chumi zawhah HSSLC a zo leh ta a ni.
An tlanchhiat hma pawhin an raltlanna hmunah lehkha hi zir a lo tum lawk ve hrim hrim a, an tlanchhia pawh hi, an unaua lehkha an zir chhunzawm an beisei vang a ni tel. An khua a him lo a, lehkha an zir thei dawn lo tih hriain Mizoram an pan a ni.
“Kan khuaah tak chuan an inkap lo a, mahse kan khaw bul velah an indo a. Silai ri te, bomb ri te kan hre thin a. Kan hlau a, kan khuaah an inkap ve tep ang tih kan ngaihtuah a, chuvangin tlanchhiat mai hi kan duh a ni,” tiin an dinhmun a sawi.
Ngun |ha Hnem-i te hian kawl tawngin lehkha an zir thin a, Myanmar atanga raltlan naupang dangte ang bawkin Mizorama sikul a luhin Mizo, English leh Hindi te a zir thar a ngai. English hi chu an khuaa sikul a kal lai khan subject pakhat a ni a, Hindi hi chu a hming pawh a hriat chawp a ni.
“Mizo tawng hi kan hmang sa a, mahse a ziah leh a chhiar ka harsat a. English hi a har ka ti a, Hindi chu a bul atanga ka zir a ngai,” tiin Mizorama lehkha a zir tirh lama a dinhmun a sawi.
“Subject tin hi a har ka ti vek mai, theihtawp chhuaha ka zir a ngai. Pawl 12 thlenga ka zir thei hi ka lawm,” a ti a, college luh a tum thu a sawi bawk.
“Ka rilru a chak lo a, zir taihmak ngai chi ka ni a, chuvangin theihtawp ka chhuah thin,” a ti a, zanah pawh dar 11 thlenga a zir thin thu leh exam lai phei chuan dar 12 a thlen thin thu a sawi.
“Finna kan duh vek a, tu pawhin. Hmasawn kan duh vek a, ka chhungte pawhin lehkha zir zel turin min duh,” tiin raltlan ni chunga lehkha a zir chhan a sawi a, Khawbunga sikul a kal tawhnateah zirtirtute an fel thu leh an zirtirnate a hlawkpui thu te, a zirlaipuite pawh raltlante chunga an fel thu, an en hran loh thu te a sawi.
Lehkhazir hi nin chang a nei a, sikul kal peih loh tum te pawh a nei. Mahse, “A chang chuan lehkhazir hi ka ning thin a, sikul kal peih loh chang te pawh ka nei a. Mahse ning chung chung pawhin ka ti hram hram thin,” a ti.
A naupan lai atangin Mizoram a hria a, Mizorama zin te pawh a chak thin. Mizoramah ngei lehkha a zir thei hi vannei a inti a, zir zel pawh a tum a ni – Aizawlah college kal a tum.