Hriatna leh thiamna lam tipung turin chanchinbu leh lehkhabu dang pawh zirlai zingah chhiar peih an tlem tih Information & Public Relations minister Lalruatkima chuan a sawi.
I&PR department-in accredited journalist-te puala hun a buatsaih a hmanpuinaah Lalruatkima chuan chanchinbu leh lehkhabu chu kan hriatna leh thiamna tipungtu a nih laiin, tunhnaiah HSLC leh HSSLC pass tharte lawmpuina pual hun a hmanpui ve \hinnaah zirlai pass tharte chu he zawhna hi a zawt \hin tih a sawi a. Zirlai za vel zingah mi 5 chiahin chanchinbu an chhiar \hin thu an sawi a, an zirlai ni lo lehkhabu dang, tunhnaia chhiar chhuak phei chu mi pahnih chiah a la tawng tih a sawi.
Journalist-te chu an thuziak leh thu puanzarin ram inrelbawlna thlenga nghawng a neih theih avangin an pawimawhna hre thar tur leh an thuziakte uluk lehzuala endik \hin turin I&PR minister hian a fuih a. Press accreditation card chuan \angkaina tam tak Mizoram chhung leh pawnah a nei tih sawiin, chutih ruala mawhphurna a kentelte chu hrereng turin chanchinbumite a chah a ni.
Information technology-in khawvel a run mek a, technology chhuak tharte umpha tur chuan mahni insiamrem a ngaih chang a awm fo, tiin, hmanraw thar hmang thiam zel turin journalist-te pawh mahni intuaihriam thiam turin a chah. Social media hmansualna a tam hle nia a hriat thu sawiin, a bikin \awngkam mawi lo leh thuziak dik tawk lo a hluar hle a, accredited journalist-te chu hemi kawnga fimkhur tura ngenin ‘Journalist Ethics’ vawngnung reng turin a sawm a ni.
MJA Gen. Hqrs. president C Lalrambuatsaiha chuan press accreditation card sem chhuah a nih theihna tura minister leh I&PR department hmalaknaah lawmthu a sawi a ni. Press accreditation card hi kum hnih chhung nung tur a ni a. Mizoram district hrang hranga a\anga Mizoram sawrkar hnuaia accreditation dilte a\angin State Press Accreditation Committee chuan uluk taka thlang chhuakin, a vaiin journalist 140 hnenah pek a ni. Aizawl district bikah journalist 51 hnenah pek a ni.
Zirlai zingah chanchinbu chhiar an tlem – I&PR minister
