Indian zirlai, Tapala Nadamuni, kum 23, chuan vacuum cleaner tê reuh tê a siam a, Guinness World Records-in khawvela vacuum cleaner tê berah a puang. Tapala vacuum cleaner siam hi 0.65 cm (0.25 inch) a lian niin, 2022-a hetiang record an siam aiin 0.2 cm-in a tê zawk a ni.
He vacuum cleaner hi a handle leh power cord dimension te teh tel a ni lo va, a tak (body) chin chiah teh a ni. Tapala hian 2020 khan hetiang record hi a lo siam tawh a, chumi tuma a vacuum cleaner siam chu 1.76 cm a lian a ni a, mahse, 2022-ah a record hi midangin an rawn khum a, tunah record thar a siam leh ta a ni.
Tapala chuan 2020-a a vacuum cleaner siam nen a design a hrang hlak niin a sawi a, vacuum cleaner a nih ang ngeiin bawlhhlawh hip lut thei a ni ve thlapa, electric current a hmang ve thei thlap bawk. A vacuum siam nan hian ballpoint pen refil a hman bakah plastic leh thir tê reuh tê tê a hmang tel bawk. A vacuum chhungah hian fan vir tei, 4-volt bibration motor hmang a awm a, chu chuan bawlhhlawh te a hip lut ve thei a ni, bawlhhlawhah pawh lei nawi vel bak a hip lut thei lova, a bawlhhlawh hip khawl te chu a paih fai ve leh theih thlap bawk.
Tapala chuan a vacuum siam nan hian Rs 20,000 vel a seng niin a sawi a, a naupan lai atang tawhin eng eng emaw han siam chhuah vel hi a hobby pakhat niin a sawi a, Guinness World Record a siam thei chu lawmawm a tih thu a sawi bawk.
Zirlaiin vacuum cleaner tê ber siam
