Zirlaite pual Science Hackathon zo
Rise and Shine, Samagra Shiksha leh Education Department buatsaih Mizoram pum huap Science Hackathon chu Nilaini khan Aizawlah khar a ni a, lawmman sem nghal a ni.
Science Hackathon hi class 6 atanga class 10 zirlaite tana buatsaih a ni a. Round thumah then niin, quiz round, live challenge leh final meet up neih a ni. Zirlai titha zual 10 thlang chhuakin Nilaini khan mipui hmaah project an sawifiah. Govt Mizo High School zirlai Lira Lalrinsangi, class 9 chu titha bera thlan niin Rs. 10000 a dawng. Pahnihna chu Lalrinzuali, class 8 Govt Chhinga Veng Middle School-in Rs. 7000; pathumna Lalhmangaihzuala, class 10 Govt Mizo H/S in Rs. 5000 a dawng a ni.
Kharna hun hmanpuitu Power & Electricity minister R Lalzirliana chuan khawtlang nun hmasawnna atana pawimawh bulpui chu zirna a ni a, ram leh hnam hmasawnna turin field hrang hrangah mithiam bik kan neih a ngai a, chutiang mithiam chher chhuak tur chuan education kan mamawh, tiin a sawi.
Mihring nunah zirna in tawp ni a nei loa, zirna tluang pangngai piahlamah co curricular activities, hackathon ang chi te a pawimawh a, hlawhtling taka Mizorama zirlaite tana Science Hackathon buatsaih a ni chu lawmawm a tih thu a sawi a ni.
“Thil thar hriatbelhna bakah mipui hmaa din theihna remchang siamsakin, zirlaite mahni inrintawkna nasa lehzualin a pe dawn a ni,” R Lalzirliana hian a ti a. Zirlaiten environment humhalhna lam leh pipute lo neih dan bansana tunlai lo neih dan tha zawk kalpui a tulzia an sawi chu ngaipawimawh a, vei chhunzawm zel turin zirlaite a fuih.
Science Hackathon hi zirlaiten lehkhabu atang chauh ni lo, a taka science thiamna an neih theihna’na ruahmanna a ni a. Mizoramah Bhoomi Educational Consultancy-in a duang a ni.
Zirlaite pual Science Hackathon zo
