Zirlaite thiam chin hriatna’n
ram pumah survey nei dawn
SCERT Mizoram leh PARAKH, NCERT New Delhi tangdun buatsaih, district level coordinator leh master trainer ho tan Thawhtanni khan Aizawlah wowkshop an buatsaih.
Inbiakhmuh theihna kaltlanga hmanpuitu PARAKH NCERT CEO & head Prof Indrani Bhaduri sawi danin, PARAKH Sarvekshan 2024 hi National Achievement Survey (NAS) tih thin a ni a; ram pumah kumin December 4-a neih tur a ni a. Foundational, preparatory leh middle stage zirlaite thiam chin hriatna a nih angin pawl 3, pawl 6 leh pawl 9 zirlaite puala buatsaih a ni.
Ram puma naupangte thiam chin hriatna tur a nih avangin a mawhphurtute, a bikin field investigator-ten fimkhur leh fir taka inkaihhruaina dan duansa an zawm a ngai tih sawiin, “State dangah sikul zirtirtute thahnem ngaih lutuk avanga naupang chhan tur an lo chhansak chanchin sawi tur awm thin hi a pawi hle,” a ti.
SCERT Mizoram joint director Dr Lalduhawmi Thomte chuan National Achievement Survey (NAS) pawimawhna a sawi a. PARAKH Rashtriya Sarvekshan 2024 neih tur inbuatsaihna atan piloting state 10-a kalpui a ni a; chu’ng zingah chuan Mizoram thlan a ni a, kumin May 8-10 khan school 37-a zirlai 1336 ah survey neih a ni tih a sawi a ni.
PARAKH Rashtriya Sarvekshan atan Mizo naupangten survey-a zawhna an hmelhriatnan leh inbuatsaihna atan SCERT leh Samagra Shiksha chuan November tawp lamah Pre-NAS Survey hi school tinah pawl 3, 6 leh 9 ah neih a ni dawn tih a sawi bawk.
Workshop-ah hian PARAKH, NCERT leh SCERT Mizoram atangin resource person-ten hun an hmang zui a ni.
NCERT hmalakna – Performance Assessment, Review and Analysis of Knowledge for Holistic development (PARAKH) hi NEP 2020-in India ram zirna kalphung thar ruahman tih hlawhtlinna tur peng pakhat a ni a. India rama district 782-a school 8800-ah survey neih tum niin, pawl 3, 6 leh 9 zirlai nuai 23 chuang chhan tur zawhna tawng 22-a buatsaih a ni. Naupangte thiam dan chin rualkhai zawka tehna hmanrua niin, School Education hmasawnna tura ruahmanna siam dan tur hriltu a ni bawk.
Zirlaite thiam chin hriatna’n ram pumah survey nei dawn
