By Dr. C. Lalrampana
A KAMKÊUNA
Zirna pawimawhzia hi kan hre tlang theuh awm e. Mihring lo piang chhuak phat hi zirtir ngai nghal kan ni. Thuhriltu awm lovin engtin nge an hriat ang? Zirirtu awm lovin engtinnge kan thiam anga kan hriat nghal ngawt ang ? Chuvangin, mihring lo piang chhuak hi mi pangngaia thang chho tur chuan zirna hian hringnun lairil ber a luah tur a ni. Zirna hian thiamna ziktluak; thutlukna dik siam theihna; ngaihtuahna fing; mahnia harsatna sutkian dan; hmathlir dan mumal leh fumfe taka hmalam huna ruahmanna tha zawk siam theihna tura finna, remhriatna leh theihna min pe a ni. Hetiang khawpa pawimawh hi a nih avangin Sorkar Department hrang hrang pawimawh tak tak zingah hian Zirna kalpuitu Education Department hi a pawimawh lawtlak ti ila kan daw tampui awm lo ve. Zirna hi hmasawnna famkim (all round development} a ni ti hialin mithiamte chuan an sawi thin. Zirna hlawhtling leh fumfe nei tur chuan Zirlai naupang; nu leh pa; zirtirtu leh zirna in leh hmun bakah zirna hmanraw famkim a awm tur a ni.
POLITICAL APPOINTMENT
Kan zoramah chauh ni lovin khawvel ram changkang tak takah pawh ‘Political Appointment’ kan tih, hna latu tur bika ruat thuneitute hriatpui lem loha Political leaders-te duhzawng leh thamna hmanga sorkar hnaa inhnimluh (political appointment) hi a tam ve hle. Kan Zoram bikah phei hi chuan sorkar department hrang hrangah a tam hle thin nia sawi a awm thin. Hna lak tur tehna hrang hranga teh tlinna reng nei lote pawh lak an ni fo thin niin a lang. Mahse, a taka an han thawh meuh chuan duhthusam lo tak tak an ni leh si thin. Hun engemawti atang khan hetiang hi um bo a nih theih nan Mizoram Public Service Commision (MPSC) & Mizoram Subordinate Services Selection Board -(MSSSB)-te dinin kan han kalpui ve a; mahse, hei pawh hi a kawchhung, a rilpui leh rilfãng thlenga han hai darh tak tak chuan a la dik famkim tawk lohna sawi tur hria an la awm fo nia sawi a awm thin. A bikin zirna kaihhnawih department tan phei chuan hetianga zirtirtu leh thawktu lak thin hi kan ram leh hnam pumpuiin a tuar bik em êm a ni. Quality Education; Technical Education; Smart Education, World class Education nei tur chuan ‘Political employee’ hi Education Department bikah chuan awm lo tawp thei se thil tha ber a ni. MPCC ministry hun laia Education Reforms Commission May 8, 2009-a din a nih lai pawh khan tun lai ang tho hian political appointment hi a bo chuang lo niin a hriat theih.
ZIRTIRTU CHUANG TLAI
Right to Education Act, 2009 norms & standards for a school-tiha tarlan a nih danin Elementary Education bikah sikul naupang zirlai 30-in zirtirtu 1, 60-in zirtirtu 2; 61-90-in zirtirtu 3; 91-120-in zirtirtu 4; zirlai 150-in zirtirtu 5 Headmaster tiamin nei tura tih a ni. Hetiang chiah hian kan sorkar hian kalpui duhin kalpui ngam se’ng chuan zirtirtu lak belh ngai hauh lovin an chuang teuh thei zawk niin a lang. Tuna kan dinhmun dik tak Elementary (P/S & M/S) Education bik hi han thlir lawk teh ang.
School Student Teacher
P/S 1935 1,13,649 7,852
M/S 1549 94,949 9,176
H/S 715 40,605 4,303
HSS 205 28,134 1,920
RTE Act, 2009 norms ang hian kal dawn ta ila P/S bikah zirtirtu pakhat zelin zirlai 14.47 chauh a enkawl a ngai dawn a, M/S bikah zirtirtu pakhat zelin zirlai 10.34 chauh a enkawl dawn tihna a ni bawk. RTE norms ang chuan zirtirtu 1 zelin zirlai 30 zel enkawl tura beisei an ni. Hetiang hi ni dawn ta se P/S zirtirtu 7,852 -te hian zirlai 235,560 an enkawl tawk tihna a ni a; chutiang zelin M/S zirtirtu 9,176 chuan zirlai 275,280 lai an enkawl tawk tihna a ni bawk. Hetiang hi ni ta se P/S -ah zirlai 121,911-in la pun belh mah se zirtirtu 7,852 hian lak belh ngai lovin an la enkawl thei cheu dawn tihna a nih hmel. Chutiang bawkin M/S-ah pawh zirlai 180,331 pun belh mah se, zirtirtu 9,176 -te hian an la zirtir thei cheu dawn tihna a ni ang.
Tichuan, RTE Act, 2009 norms angin kal dawn ta se P/S-a zirlai 1,13,649-te hi zirtirtu 3788;in an zirtir tawk a; zirtirtu 4064 an la chuang tihna a ni. Tin, M/S-a zirlai 94,949-te hi zirtirtu 3154-in an zirtir tawk a, zirtirtu 6021 an la chuang tihna a ni. Zirtirtu chuang tlai anga lang zawng belhkhawm chu 9175 lai a tling a ni. H/S & HSS chin chu subject wise-a zirtirna kalpui tur a nih avangin Elementary stage angin kalpui chi a ni ve lem lo.
A TLÃNGKAWMNA
Tikhian Sikul Education Department hnuaia zirtirtu indaih dan leh indaih loh dan chu kan hre ta a. RTE Act, 2009 anga chhut chhinna ang diak diak khi ni thei lo mah se, P/S-HSS-a zirtirtu semrual dan hi a rual khai loh avang leh Aizawl khawpui & district khawpui apiangah zirtirtu an buk avang hian thingtlang khua apiangah zirtirtu an indaih lo thung niin a lang. Khing zirtirtu chuang anga lang belhkhawm 9175-te atang khian zirtirtu 200-300 dawn vel chu Section 27 of RTE Act 2009 palzuta anmahni hna ni lo pisa lama dah an la awm nia hriat a ni lehnghal a, chungte tiam lo pawhin zirtirtu hi semrual ni se chuan zirtirtu indaih lo tih hi a awm lovang. Mahse, sikul thenkhat zirlai aia zirtirtu tam zawkna te, zirtirtu & zirlai inzatna te, zirlai pahnih khat lek awmnate nen uluk taka chhut chhuaha semzai ni se chuan zirna tha zawk kan nei thei ngei ang.
Heng zawng zawng lo awm thinna chhan chu Education department hi a lian tham a, thawktu an thahnem a, politician tan vote bank tha tak a nih avangin football khel mual chikhat ang mai a nih vang a ni. Chuvangin, tupawh lo sorkar leh se, Education department bik hi chu football khelmual anga hmang tawh lovin office of procedures/rules/act ang taka kal thei turin zalenna pek ni zawk se kan ramin zirna tha a nei thei ngei ang.