Sawrkar school zirtirtu inzawmkhawm chuan academic session hman thin, January - December anga kal leh an duh tih an sawi a.
School education minister Dr Vanlalthlana chuan, academic session leh common school uniform hman mekah, thlak duh leh thlak duh lohah mipui ngaihdan lak a ni ang a, a tam ber duh dan angin an kal dawn tih a sawi bawk.
Hengte hi Ningania Aizawla Mizoram Teachers’ Federation (MTF) general conference vawi 6-na hmannaah tarlan a ni.
Hei bakah hian, tunlai naupangin YouTube an en nasat tawh avangin hei hi a tangkai zawnga hman a nih theihnan education department chuan zirlaite nun kaihruai thei tur youtube-a dah turin cartoon buaisaih mek a nih thu tarlan a ni bawk a. Class IX-ah common question hmanga exam kalpui turin ruahman mek a ni a, second term exam 2025 atanga hman tan tum a ni bawk.
Zirna hi hmantlaka mihring chher chhuahna kailawn pawimawh ber a ni a, chuvang chuan Mizote pawh hian zirna hi kan ngaipawimawh a, neihin a tlin loh pawha puk chawp chunga fate sikul thaa dah tum hram hram hnam kan ni, a tih theih awm e.
Sawrkar pawhin zirna hi a vei aniang, sawrkar thar apiang hian eng tin emaw tak zirna kalphung siksawi hi an tum deuh zel a, hei hi kan thatpui nge thatpui lo tih lam erawh an bengkhawn zui em em tawh ngai lo.
Zirna hi kan zir nasa a, zir dan lah kan thlak kual nasa. Zirna kalpui kan tum dan te lah a hming kan lam ropui thin teh e - World Class Education, Quality Education etc.
CCE kha kan fak viau a, kan han kalpui a, kan zo lo a. Zingkar hma takah sikul kan han tan ve a, mahse kan zo lo kan ti leh a, a ngaiin kan kal leh a. Academic session te pawh kan thlak kual a, common uniform kan ti, tunah ‘thlak duh leh duh lo’ kan buk leh dawn a.
Khaw’nge kan zirna ber hi a awm tak tih mai a awl dawn khawp mai. Tuna kan hman mek ‘teaching method’ te, ‘learning method’ etc. te hi ennawn emaw siksawi emaw te hi a lo hun ve viau tawh reng lawm maw ni le?
