A tul vang leh mamawhna avanga zirtirtu sawn an niha midang kheuh ching an awmin harsatna a thlen phah thin, tiin school education minister chuan tunhnai khan a sawi a. Hetiang hi a awm tawh lohnan a tul angin action an la dawn tih a sawi bawk.
Minister thusawi atang hian, transfer duh loh avanga khawtlang leh zirlai pawl kheuh ching zirtirtu an awm thin niin a lang a. Chemtatrawta thawnthu kan iang hle mai.
Kaikuangin Chemtatrawta a kheuh zeuh a, a hnuah amah avangin midang tam takin an tawrh phah a, khawtlang an buai luai luai a, an buai chhan an han chhui let zar zar a, a tawpah Kaikuangah a tawp leh a. Buaina chinfel a han ni a, mipui pawh an thaw huai a; mahse, Kaikuang hmui erawhin a tawrh phah tak kha!
Thla kal ta June thla chhung khan, ‘zirtirtu transfer duh lohna’ emaw, ‘lungawilohna’ emaw, zirlai leh khawtlang pawl tangrualin an huaihawt a awm nual mai a, sawrkar tan pawh a luhaithlak duh khawp ang. Education minister-in a sawi ang khian, buai chhan ber hi ‘inkheuh zeuh’ thil a lo ni thin a nih chuan, zirlai pawl hruaitute leh khawtlang hruaitute pawh kan inenfiah a pawimawh dawn hle tih a lang.
Sawrkar laka lungawilohna lantir hi democracy ramah chuan mipui dikna leh chanvo a ni a, chutih rualin roreltu ang hrima thuneitu zawk anga chet chiam chiam erawh thil kalhmang a ni chuang lo.
Hetiang thilah hian, zirlai pawl leh khawtlang hruaituten rilru fim tak pu chunga sawrkar an dawr hmasak fo hi kalphung dik a nih mai piah lamah, a himin, harsatna thleng thei tam tak pumpelhna tur pawh a nih a rinawm a. Chuti ni lova, a lehlam chauh thu leh hla la vawng a, a haw haw zawnga kan kal thin a nih chuan, a tuartu chu zirlaite bawk an ni leh thin a, hei hi a pawi em em a ni.
Chutih laiin, sawrkar lam pawhin tih fuh loh chang an neih a rinawm a. Tunhma atang tawhin ‘political power’ han exercise duhna hi a lo awm tawh thin a, chu chu harsatna thleng thinah hian ‘a kaikuang’ ber ti pawhin a sawi theih ang.
Chin dan dik lo, kalphung fel lo leh tha lo hi tihtawp tum lova ‘anni pawhin an lo tih ve thin tho kha’ tih avanga chhawm nun zel kan tum chuan, engtik khawtikah mah rorelna fel hi a awm ngai dawn lova. Chuvangin, thil tha a lo chhuah dawn chuan a siamthatna kawngah a tuartu an awm a ngai tih hi kan hriat nawn fo a pawimawh a ni.
