Tul leh mamawh avanga zirtirtu sawn an nihin, midang kheuhtu an awmin harsatna a thlen phah thin tih School Education minister Dr Vanlalthlana chuan a sawi a. Hetiang hi a awm tawh lohnan a tul angin action an la dawn tih a sawi.
School Education minister chuan zirtirtu bakah department officer (CEO, SDEO, DEO) sawn chu sawrkar hmasa hun lamah pawh a thleng fo a, tunhnaia transfer order an siamah order sut leh tura nawrna an dawng nasa a, hemi kaihhnawiha indan leh school khar chu a bikin ruling MLA bial ni loah a tam zual em ni tih theih a ni tih a sawi.
“Transfer dilna hi awm kan tih pui leh an sikul kalsanin tuar lo tura kan ngaihte chauh kan sawn a. An sikul kalsanin tuar dawna kan hriat chuan a hnawhkhahna tur kan zawng tel thin. Kan tihna thenkhatah zirtirtu thenkhatin hah ta viaua an inhriat avang leh sikul dinhmun tarlang duh lem loin sikul dan leh nawrhkhum kan tawk ta zel a ni,” a ti.
Zirtirtu indaih emaw an tih laia dam lohna emaw harsatna lian tak nei an lo awmin transfer order sut leh pawh an nei nual a; zirlaiten an tawrh dawn chuan order sut leh an hreh ngai lo tih a sawi.
Tunhnaia nawrh khum an tawhnaah pawh indaih lo ang taka an insawi ang chu a takah a ni loa, zirchiang hmasaa sawn an ni tih Dr Vanlalthlana hian a sawi a. Hmun tam takah zirtirtu an sawnin zirlai pawl leh NGO-ten an khaw sikul-a zirtirtu dinhmun sawi duh loin hma an la leh mai thin nia an hriat thu a sawi.
Tunhnaia zirtirtu pakhat bakah LDC sawn chhuahnaah pawh an sawnchhuah hi mimal harsatna lian tak nei, politics lama sawi saktu tumah nei lo niin, an dinhmun an hriatthiam pui vanga sawn an ni a. Zirtirtu la awm leh an zirtir theih dan an zirin an zirlai neih zat hi enkawl zo tho tur tih an hriat avanga sawn an nih laiin, zirtirtu zingah zirlai pawl hnena lo zualko an awm tih an hria a, hei hi sawrkar chuan a ngaithiam lo hle tih a sawi.
“Boruak azirin he zirtirtu chungah hian na taka action lak a ni dawn,” minister hian a ti.
Higher secondary leh college zirtirtu semrual leh mekah pawh zirlai pawl emaw khawtlangin aw an neih hma in zirtirtu sawn takte harsatna, class an lak dan leh an dinhmun hrechiang hmasa turin a duh tih a sawi a. Thil tih awm loh tak a awm a nih chuan an insiamrem hreh loa, politics thil emaw pawl anga hma lak duh avanga innawr erawh a remchang lo, tiin, nakin zela sikul tana hmalaknaah pawh inpuih tawn a harsa thei dawn tih hriatsak se an duh tih a sawi bawk.
Education minister sawi danin:
8 Tunah hian elementary (primary leh middle) school chinah zirtirtu nghet 2936 an awm mek laiin, post ruak 3296 an nei. Contract, MR teacher leh casual teacher 1647 an nei a. Elementary school-a an indaih lohna chu 1649 a la ni tho.
8 Primary school casual teacher 234 la leh tura hma lak mek leh Transfer and Posting Rules 2025 an buatsaih mek hian hmun tam taka an indaih lohna a tihziaawm an beisei.
8 Secondary school (high school leh higher secondary school) lamah tlemin an indaih hret a. Maths leh science zirtirtu erawh an indaih lo viau. Hei hian nasa takin harsatna a siam a, nawrhna pawh a thlen tam ber a ni.
8 Hindi zirtirtu tam tak hi sawrkar sikulah awm loin private sikulah awm an awm a. Sawrkar sikula an indaih loh em em laia private emaw aided school-a dah chu fuh an ti loa, sawrkar sikula semrual phawt a, chumi hnua aided sikul-a dah tha an tih avangin an chungchang ngaihtuah mek a ni.