Unesco-in ‘2021 State of the Unesco Education Report for: No Teachers, No Class’ a tihchhuahah chuan India rama sikul nuai 1.1 vel zet chuan zirtirtu pakhat chauh an nei. Sikulin a mamawh zat zirtirtu awm lo 19% (nuai 11.16) zet a awm a, heng zinga 69% chu thingtlang khuaah a ni.
Sorkarin a chhinchhiahna mila zirchianna buatsaihah pawl III, V leh VIII tan Unesco chuan zirtirtu lak belh, zirtirtute hna thawh dan tihdanglam leh ‘district hnufual bik’ siama zirtirtute pawh a hmatawnga thawktu anga chhal turin rawtna a siam.
Pre-primary-a thawk mek zinga 7.7%, primary-a thawk mek zinga 4.6% leh upper-primary-a thawk mek zinga 3.3%-te chu thiamna ngai nei phak lo niin data siam atanga zirnaah hian hmuh a ni.
“Covid-19 hripui leng vang khan zirtirtute thawh dan leh a hna ruak hi a hril thui hle a, zirna tha leh ngialnghet pawh a khawih nasa a. India-ah hian zirtirtu zinga a zahve chuang hi hmeichhia an ni a; mahse, state azir leh thingtlang leh khawpui azirin a zat a danglam hle,” an ti.
State pathum, zirtirtu hna ruak nuai chuang awmnate chu Uttar Pradesh (nuai 3.3), Bihar (nuai 2.2) leh West Bengal (nuai 1.1) an ni a. Heng state pathumte hi Unesco-in a tehna hrang hrangah zirna lama dinhmun hniam zual an ni bawk. Madhya Pradesh chu zirtirtu pakhat chauhvin a enkawl sikul tamna ber a ni thung a, sikul 21,077 a awm. Thingtlang lama zirtirtu hna a ruah tamna ber chu Bihar a ni a, zirtirtu nuai 2.2 mamawh belh anga ngaih niin heng zinga 89% hi thingtlang khuaah a ni. Uttar Pradesh-ah pawh zirtirtu hna nuai 3.2 a ruak a, heng zinga 80% chu thingtlangah a ni a. West Bengal-ah hna ruak zinga 69% chu thingtlangah a ni.
Unified District Information System for Education-in data an neihah chuan thingtlang leh khawpuiah zirtirtu awm zat a inthlau hle tih a lang a, hmarchhak state-ah zirtirtu atana tling ngei mamawhna a sang hle bawk.
Zirtirtu pakhat chauhvin India-a sikul nuai 1.1 an enkawl
