- Education minister
Zirtirtu qualify lo awm lohna turin
MSU ngen bak kan bawhzui tel
- Education minister
College zirtirtu danin a phut anga tling pha lo mi 29 ban tura zirlai pawlin kawng an zawh chu lawmawm a tih thu Education minister Dr Vanlalthlana chuan a sawi a. Zirtirtu qualify lo dang pawh ‘last chance’ pek mek an awm nual tih a sawi.
Thawhtannia ZPM office-a inkhawmah Education minister chuan, sawrkar hmasaa MPSC kaltlanga an lak, unqualified assistant professor, kum 2008 atanga thawk tawhte zirlaiten kawng an zawhpui ngam chu a lawmawm hle, tiin, “Tuna unqualified part time-a thawk mi 29 an aupui bakah college pangngai, Law College leh Mizoram Polytechnic Lungleia unqualified contract asst. professor-te pawh sawrkarin show cause notice a pe vek tawh a. Sawrkar hmasa lama an chai tam loh, aikal lak pawh zirlai pawl an tawng chhuak ngam ta hi a lawmawm takzet,” a ti.
Zirtirtute attendance check ngam sawrkar a ding ta a, Kai App siam a ni tih a sawi a. School zirtirtute an kal that phah a, app-a result a that vang nge, department zawng zawngah hman a ni ta chu a lawmawm hle tih a sawi a ni.
MTET nei lo MR zirtirtu tam tak last chance pek mek an awm bakah Samagra Shiksha hnuaia zirtirtu qualify lo awmte zawn chhuah an ni a. Dan laka sawrkar himna turin uluk takin engkim zirchian a ni a, hemi nghak zo lo hian zirlaiten kawng an zawh tih Dr Vanlalthlana hian a sawi.
“An duh angin a tih nghal vek theih loh a, sawrkar chuan hma a la zel dawn tih erawh hria se ka duh hle. Hun inpe loa mi chaw bel ben buaksak hi sawrkarin a duh loh avangin, dan zuiin sawrkar chu a kal mai a ni. ZPM sawrkar hnuah advertisement tel loa hna lak a awm lo mai ni loin, school leh college-ah unqualified teacher lak an la awm lo. Asst. professor atan NET emaw PhD emaw nei lo dahnghehna atan ‘file put up’ a awm tawh lo a. NET nei lo lak a ni dawn lo,” a ti.
Kum 2019-a lak, MR zirtirtu 800 chuang zingah qualified lo mi 100 chuang awmin, qualified tam tak an awm tawh avangin tunah hian sawrkarin last chance a pe leh mek tih minister hian a sawi a. Sawrkar hmasa in an qualify ve theihna turin kum 2024 thleng hun a pe ai. Heti a nih chuan MR zirtirtu thenkhat, lehkha zir mekten an tuar nghal dawn tih a sawi a ni.
“Zirlai pawlten sawrkar hmasa hnuaia sawi awmzia nei loa an ngaih, aikal leh unqualified teacher chungchang an auchhuahpui theih chhan chu sawrkarin huai taka hma a lak tak vang a ni,” a ti.