Zirtirtu qualify lo kha…

Higher & technical education minister chuan kar kalta khan, college zirtirtu zingah danin a phut ang qualification neih ngai nei pha lo casual lecturer 108 an awm thu a sawi a. Hei bakah hian part time-a thawk zingah qualify lo 32 leh contract-a thawk zingah qualify lo 4 an awm tih sawiin chung mite chu ban mai an ngaih tur thu a sawi bawk a.
Lecturer qualify lo tam zawk hi, danin a phut anga National Eligibility Test nei lo an ni deuh ber a, contract lecturer phei chu kum 2008-a lak tawh, chance vawi tam nei tawh an nih avangin qualify lo chu an hun a tawp chuan chawlhtir mai an ngai dawn niin minister chuan a sawi bawk a ni.
Kan hriat angin, kan hnung lawkah, certificate lem hmanga kum khat zet ha daktawr (dental surgeon) hna lo thawk chu hriatchhuah a lo ni tawh bawk a. Ha natna enkawl tlak tura thiamna nei tihchianna ‘certificate’ dik nei pha lovin, certificate lem hmanga damlo a enkawl chuan, damlote an ngaihtuahawm hle dawn tih a lang a ni.
Chutiang bawkin, zirtirna pe tlak tih finfiahna NET nei loten zirlai an hrual a nih chuan, zirlaite an ngaihtuahawm hle dawn tihna a ni awm e. |henkhat phei chu, 2008 atanga lo thawk tawh te an ni lehnghal a, kum 16 chhung zet zirlaite an lo zirtir ve tawh thin tihna a ni a. A tirah NET nei lo pawh ni se, hna an thawh hnuah pawh NET neihna chance an ngah hle a, kum 16 chhunga NET an nei thei lo a nih phei chuan zirtirna pe turin an qualify lo hle tihna a ni mai awm e.
Heng, danin a phut anga qualification nei lote hian qualification neite thawh ang an thawk reng si a nih chuan, anmahni lam chu a enga pawh lo ni se, a ruaitu lam chung pawh hi a pik pha tho tihna a ni. Lecturer-te hi an demawm ngawt lo a, a demawm zawka chu, qualification nei lo tih hre reng chunga ruai tlattute hi an ni a tih loh theih loh. Qualified lecturer ni hawt si lovin kum 16 tal tap a zirtir chhung khan, a ke bula seilian zirlai engzat tak awm ang maw?
A pawimawh ber chu, Dan anga thiltih mai hi a ni. Heng unqualified casual lecturer, part time lecturer leh contract lecturer-te hian ‘kan thawk lui tho tho dawn’ tiin dan an palzut ngawt thei lo a, an palzut pha dawn hek lo. Mahse, a ruaitu lamin dan an palzut hmasa tihna a ni mai a, a ruaitu lam hi an demawm hmasa zawk awm e.