College-a part time assistant professor mi 29, danin a phut ang nei kim lote chu sawrkarin insawifiahna hun ni 15 chhung a pe a, chuta an insawifiahna thutlinga ngaih a nih loh chuan ni 5 chhunga ban fel hman tum an ni.
Heng mite chungchanga hma laa ban tura sawrkar nawr mektu Mizo Students’ Union huaihawtin Thawhtanni khan Aizawlah Vanapa Hall kawt atangin Higher & Technical Education directorate Zarkawt thleng “Quality Education Humhalhna Kawng Zawh” neih a ni.
Kawngzawh hmaa hun hmanah MSU Gen. Hqrs. president B Lalkhawngaihzuala chuan, unqualified teacher-te sawrkarin chance a pe fo chu tha an ti lo a. Tuna an chance pek pawh hi nakumah chance an pe nawn leh loang tih a sawi theih loh, tiin, “Ram hruaitute hian central service-a tling tura zirlaite fuih reng chung siin, qualified lo ziritrtu an ruai reng hi hriatthiam a harsa a. MSU ngenna sawrkarin a tihlawhtling lo a nih chuan a tawp thlengin na taka hma lak kan tum,” a ti.
Kawngzawhah hian MSU vice president Roluahpuia, joint hnampual zirlai pawl president K Jerome leh Aizawl City College Joint Students’ Union general secretary C Lalduhsaka te pawhin thu an sawi a ni.
Kawng zawh hun hnihna H&TE directorate kawta hman a nih lai hian sawrkar hruaitute nen MSU lam aiawh an inbia a. Sawrkar chuan dan a zawm a ngai tih hrilh an ni a, MSU nawrna avangin heng mi 29 hi show cause notice pek mek an ni a, ni 15 chhunga chhang hman tura tih niin, hemi hnu ni 5 chhunga chinfel hman an tum tih MSU aiawhte hi hrilh an ni bawk.
Kawngzawhtute resolution:
8 Sawrkarin assistant professor unqualified-te lakah dan ang taka ban an nih theihnana show cause notice ni 15 chhung an pe hi tha kan ti a, show cause notice hun a liam atanga ni 5 chhungin ban an nih tur thu an sawi hi kan ring tawk a, sawrkar pawh an thutiama ding ngei turin kan ti.
8 Tun hnuah zirtirtu hna lak reng rengah qualified teachers chauh lak thin ni tawh rawh se.
8 Tuna asst professor qualify lote hi an aiawh asst professor tur qualify ngei a ranglamin la rawh se.