School education department-in tun hnaiah zirtirtu a hlawmin an sawn thin a, siamthat nghal a ngai thin bawk. Zirtirtu an sawn hian thil mak tak tak a awm thin avangin siamthat loh theih a ni thin lo. Tun hnaiah pawh zirtirtu thenkhat an sawn a, mahse siamthat a ngai leh dawn.
May ni 8 khan high school headmaster 27 an kaisan avanga sawnna notification a chhuak a, an siamtha lo a nih chuan headmaster pahnih nei an awm dawn. Chuvangin siamthat a ni ngei ang tih a rin theih a ni.
Govt Suangpuilawn High School-ah headmaster turin mi pakhat an dah a, he sikula headmaster lo ni mek hi an sawn chuang lo.
Pension hnai tawh, Aizawl atanga khaw danga sawn leh rih an awm a, headmaster-a kaisang pakhat chu a thawh mekna sikula headmaster ni tura dah ni lovin, a thawh mekna sikulah ‘attach’-in a awm dawn.
Kum hmasa lam atangin zirtirtu dan (transfer) chungchangah hian thil mak tak tak a lo awm tawh thin a, headmaster pahnih nei tur sikul pawh hi an vawi khat awmna a ni lo; November ni 18, 2024-a notification chhuakah khan Bunghmun High School-ah headmaster pahnih an awm dawn a, November ni 21-ah siamthat niin, pakhat zawk chu Tlabungah dah a ni. November ni 18-a mi-a Lungdai-a dah chu ni 21-ah Darlungah dah a ni leh daih a, Darlunga lo awm sa chu Saitualah programme officer ni tura dah niin, Saichal High School headmaster hlawh la tura tih a ni tlat bawk.
Tun hnaiah sorkarin zirtirtu a sawn nasa a, an siamtha nasa bawk. June ni 13, 2014-ah pawh khan higher secondary school zirtirtu engemaw zat sawnna notification a chhuak a, chu chu tidanglamin August ni 7-ah a thar a chhuak leh. August ni 7-a mi hian June ni 13-a mi a luahlan a, mahse August ni 14-ah a thar a chhuah leh avangin August ni 7-a mi pawh chu a luahlan leh. Chutiang chuan a hma pawhin an lo siamtha tawh thin a, kumin May ni 8-a mi pawh hi siamthat leh ngei turah ngaih a ni.
Zirtirtu sawn, sawn \ha leh dawn
