Zoram Medical College-a thuneitu thenkhat zinga ‘neuh neuh’ awm vanga an nih tur ang ni pha lo deuh thin nia sawi awm chu a hriat ve loh thu leh college/ hospital hmasawnna atan an tangrual tha viaua a hriat thu Health minister Lalrinpuii chuan a sawi.
Thuthar thehdarhtuten ZMC thuneitu inkara engemaw awm thin awm thu sawi rik fo a ni leh hei hian ZMC than zelna a tituanfum deuh nia sawi a awm chu a hriatpui em tih an zawhnaah Health minister hian, an tangrual viaua a hmuh thu leh ZMC changtlunna turin an theihtawp an chhuah tlang nia a hriat thu a sawi.
Tunhnaia National Medical Commission-in a endik thutnaah doctor-te an tlai thin avangin endiknaah hian an tla nia sawi pawh thudik tawk lo a ni tih sawiin, “Tla tih a awm loa, medical college puitling atana pawm tura tih leh neih ngai kan nei kim thei lo zawk a ni. Auditorium, guesthouse, sports complex leh a dangte a awm a ngai a, sawrkarin sum neih loh vangin kan ti thei lo. Doctor tlai vang tia sawi chu a dik loang,” Lalrinpuii hian a ti.
Zoram Medical College enkawlna senso a hautak em avang leh inspection hmachhawn mai tur nia an hriat avangin sum lamah harsatna an tawk a. Chief minister Pu Lalduhoma’n immediate relief atan cheng vaibelchhe 1.4 a ruahman sak a. Hei hian inspection neih dawn avanga harsatna zualpui a phuhruk an beisei tih a sawi.
ZMC chu sawrkar laipui kuta hlan mai tha an ti a, kumin January 17 khan Union Health minister a sawipui a, a ni chuan theihtawpa tanpui inhuamin, state sawrkarin tha zawka a kalpui theihna’n a bik taka tanpuina ‘special grant’ pek a tum thu a lo hrilh tih Health minister hian sawiin, “Special package atana project proposal hi siamfel a nih veleh Delhi-ah kan chhukpui nghal a. Parliament Session buai tak karah Union Health minister Masukh Mandaviya chuan hun remchang min lo siamsakin, February 6 khan ZMC tih changtlunna tur proposal hi kan thehlut a. Inthlan hma ngeia 1st instalment tal min pek chhuah hman a tum thu a lo sawi a ni,” a ti.
ZMC-a ‘neuh neuh’ awm hre lo
