ZMC-a Neurosurgery department awm
theih dan larsap hoin ngaihtuah khawm
Mizoram larsap Dr Hari Babu Kambhampati chuan Thawhtanni khan Health & Family Welfare minister Lalrinpuii, adviser to CM (Finance & Planning) TBC Lalvenchhunga, ZMC director Dr John Zohmingthanga leh Silverline Hospital Kochi-a neurosurgeon Dr Haroon M Pillay te chu Raj Bhavan-ah kawmin Zoram Medical College-a Neurosurgery department din a nih theih dan tur a sawipui.
Larsap chuan CSR fund chu hmasawnna ruhrel siamna atan chhawr tangkai a pawimawh, tiin, zirna, hriselna leh a dangah pawh CSR fund hai chhuah a nih theihnan public sector undertaking (PSU) hrang hrangah rawtna thlen zung zung a tul tih a sawi a. Prime minister-in PSU-te chu hmarchhak state tan an CSR fund hmang uar tura a chah thu pawh sawiin, hei hi remchangah hmanga fund hai chhuah dan kawng ngaihven nasat zual a tul tih a sawi a ni.
Health minister chuan hrilselna kawnga hma sawn turin theihtawp chhuah a ni tih a sawi a. ZMC-ah Neurosurgery department awm theihnan hma lak a nih bakah Cardiothoraco Vascular Surgery OT Unit, IVF Centre leh tul dangte a awm theihnan tan lak a ngai tih a sawi a. Health infrastructure tihchangtlun a nih theihnana larsap hmalakna leh thahnemngaihna fakawm a tih thu a sawi bawk.
Mizoram mipui mamawh em em, Neurosurgery department ZMC-a hawn a nih theihnana bawhzui tul hrang hrang sawiho a ni a. Hmunhma thuhlaah harsatna a awm lo tih sawi niin, hemi atana sum mamawh zat tur leh detailed project proposal siam chu thlirhoa pawm a ni. Hemi tur hian Indian Oil Corporation Ltd. inhuam angin CSR fund dil nise, a ranglamin DPR thawna ngaihven nise tih a ni.
ZMC-a Neurosurgery department awm theih dan larsap hoin ngaihtuah khawm
