ZMC leh Trinity Hospital telin Aizawl
chhimlam chawmtu tur tui khuap zo hnai
Aizawl khawpui tui harsatna sukiang then (supplement) tura ruahman mek ‘Alternate Gravity Water Supply Scheme of Aizawl (AGWSSA)’ enfiahin Nilaini khan PHE changtu deputy chief minister Tawnluia chuan tui khuahna hmun Hualtu khaw dai, Dilzawl hmun ami a tlawh.
AGWSSA hi Aizawl chhimlam chuanhnuai veng thenkhat – Mualpui leh Mission Vengthlang bakah Muallungthu tlangdung khua, Zoram Medical College huamtelin mihring nuai hnih vel fur ruahtui chhawr tangkai theih hun (thla 5-6) chhung vel chawm thei tura duan a ni a. Ministry of DoNER-in NESIDS hnuaia thawh tura a ruahman niin, cheng nuai 11730.35 senna tur, a vaia sawrkar laipui tum tur a ni.
Hna thawktu contractor-te nen inkawmin deputy chief minister chuan, thlen chinah hmalakna lawmawm a tih thu a sawi a. Hualtu rama Tawi tlang bulthutah tuihna tha tak leh tui khuahna tur hmun remchang tak a awm chu lawmawm a tih thu sawiin, “Tuihna humhalha tihchangtlun zel hi tun dinhmunah chuan kan mawhphurhna lian ber zing ami a nih avangin mitinin tih takzeta kan veia kan theihna zawn theuhah tan kan lak a ngai a ni,” a ti. Hnathawh ngai ang pawh thawh zawh tep niin, kumin chhung ngeia Tawi tlang tui hi mipui chhawr theiha luan haw thlen tir hman an tum tih a sawi a ni.
AGWSSA sak hna thawk tur hian tender kaltlangin M/s Kram Infracon Pvt. Ltd. and Vikash & Associates (JV) Noida thlan an ni a. 2019 September 12-a thawh tan niin 2024 March-a zawh hman beisei a ni.
Tui khuah mek hian Hualtu khaw dai, Dilzawl hmuna Tuikum leh Lunglei lui hnar bakah van ruahtui khawl (rain water harvesting) a ring dawn a, tui khuah (earthen dam) hi metre 14-a sang niin, a chhip sei zawng metre 75, metre 3-a zau, a mawng metre 82 a zau, tuikhuahin a chim chin hectare 4.1, tui litre maktaduai 74 dawng tura ruahman a ni.
Tuikhuah thlen hma metre 900 velah hian tuikhuah atanga tui lak tihthianghlimna hmunpui ‘Water Treatment Plant’ (WTP) siam a ni a, WTP hi Rapid Sand Filtration Unit kaltlanga tui thlifim tura ruahman a ni. WTP-ah hian ni khatah tui litre maktaduai 15 thlifim thei tura ngaih a ni.
WTP atang hian lei hipna (gravity) hmaning tui hi lakchhuah a ni anga, Hualtu- Khumtung- Muallungthu dai kaltlangin Muallungthu tlanga tuizem lian litre nuai 15 dawngah nitin tui litre maktaduai 12 chhunluh a ni ang.
Hei hian Muallungthu tlangdung khaw hrang hrang bakah ZMC chawm thei tura ngaih a ni a. Muallungthu tlanga tuizem lian thlen hma, Muallungthu kawng peng thuam atangin Trinity Hospital Silaimual thleng tui litre maktaduai 3 nitin lak phei a nih hnuah Mission Vengthlang tuizem lianah nitin tui litre maktaduai 1, Mualpui tuizem lianah tui litre maktaduai 2 nitin dah luh a ni ang.
Tui khuah sak hna zaa 85, WTP sak hna 95%, pipe phum hna 75% leh tuizem lian sak hna 98% zawh a ni tawh.
ZMC leh Trinity Hospital telin Aizawl chhimlam chawmtu tur tui khuap zo hnai
