ZMC&H laboratory-ah
thawktu indaihloh a na
ZMCH laboratory-ah thawktu indaih lohna a na hle a, a chhun azana duty tlang ngaih chang a tam tih sawi a ni
Nilainia Zoram Medical College & Hospital, Falkawn tlawhtu thuthar thehdarhtuten an zawhnaah laboratory-ah hian thawktu nghet 8 an awm a, project dang atangin thawktu 10 an awm. Internship ti mek mi 20 an awm bawk.
ZMC Pathology head of department Dr Zothansangi chuan laboratory technician-te chu hmuh theih loh leh hriatpui lem loha mipui tana thawktu an ni a. An indaih loa, hnathawh tur nitin a awm belh a. Chhun lama duty-ten zan lamah emergency duty an chhunzawm nghal thin. An chanvo ngei ngei, chawlh pawh an inpe hleithei lo tih a sawi.
“Staff zingah nupui pasal neiin, nau neite awm mah se, thawktu indaih lohna avangin chawlh inpek a harsa a, hetiang hunah pawh anmahni aia hna thawk thei tur inruat a ngai thin,” a ti.
Kum 2024 khan damlo 61413 hnen atangin test hrang hrang 225740 an ti a. Kumin January atanga June thleng khan damlo 70249 atangin test 318595 neih a ni. Kum kaltaa test zawng zawng aiin kumin kum chanve chhunga test hi a tam tawh zawk. Nitin routine bika test theih zat chi 128 a awm a, emergency bika test theih chi 31 a awm a ni.
Hetih mek lai hian tlawmngai pawl thenkhat atangin sample collection period tirei tura nawrna an dawng a, tuna an kal dan, chawhnu dar 1.30 thlenga test tur an lakkhawm theih chin chu chawhnu dar 3.00 thleng hawng tur nawrna a awm tih sawi a ni. Hetianga hna kalpui a nih chuan mihring leh khawlin an zawh an ring lo tih an sawi.
ZMC&H-a Technical Staff Welfare chuan Indian Confederation of Medical Laboratory Science duan angin July 17-23 chhung khan National Medical Laboratory Professional Week an hmang a. Mipui chhawr theihin an luangchhuak.
Week hman chhung hian ZMC Paediatrics department tan naute bukna khawl 5 leh nebulizer 5 an pe a. ZMC OPD-a inentirte tan a thlawnin blood glucose level leh HbA1C test tihsakin, Nilaini khan Beer Seba Group nen ZMC Blood Bank tan Voluntary Blood Donation Camp an huaihawt a, unit 41 an pe.
ZMC&H laboratory-ahthawktu indaihloh a na
